İlon Mask “OpenAI”yə nəzarət planına Mark Zukerberqi cəlb etməyə çalışıb

ABŞ-ın Şimali Kaliforniya federal məhkəməsinə təqdim olunan sənədlərə görə, İlon Mask bu ilin əvvəlində “OpenAI”yə nəzarəti ələ keçirmək üçün irəli sürdüyü 97,4 milyard dollarlıq təklifə “Meta”nın rəhbəri Mark Zukerberqi də cəlb etməyə cəhd edib. 

Valyuta.az xəbər verir ki, nə Zukerberq, nə də “Meta” bu təklifə qoşulmayıb və Maskın niyyət məktubunu imzalamayıb.

“OpenAI” bu məlumatları davam edən məhkəmə çəkişməsi çərçivəsində açıqlayıb və məhkəmədən “Meta”nın Maskla bağlı yazışmalarını təqdim etməsini tələb edib. “Meta” isə bu sənədlərin iş üçün əhəmiyyət daşımadığını bildirib.

Mask ötən il “OpenAI” və baş direktor Sem Altmanı məhkəməyə verərək, qurumun mənfəət yönümlü modelə keçməklə ilkin “bəşəriyyətin xeyrinə açıq mənbəli AGI” məqsədindən uzaqlaşdığını iddia edib. “OpenAI” isə Maskın 2017-ci ildə kommersiya modelinə keçidi dəstəklədiyini və rəhbərliyi ələ almağa çalışdığını bildirib.

Fevral ayında Mask və investor qrupu “OpenAI”yə nəzarət edən qeyri-kommersiya qurumunu almaq üçün 97,4 milyard dollarlıq təklif versə də, bu təklif dərhal rədd olunub. Şirkət Maskın bu addımının onun hüquqi iddiası ilə ziddiyyət təşkil etdiyini vurğulayıb.

“Forbes”in məlumatına əsasən, Maskın sərvəti 407,9 milyard dollar, Zukerberqin sərvəti isə 254,9 milyard dollardır.

Sərvanə Rəmixanova