"Huawei"nin çip sirrlərini oğurlayan keçmiş işçilərinə həbs cəzası verildi

Şanxay Xalq Məhkəməsi "Huawei"nin "HiSilicon" adlı yarımkeçirici şöbəsinin məxfi inkişaf məlumatlarını qanunsuz mənimsəməkdə təqsirli bilərək 14 keçmiş işçi barəsində hökm çıxarıb.

Valyuta.az xəbər verir ki, bu barədə "GizmoChina" yazıb.

Məhkəmənin versiyasına görə, iştirakçılar "Huawei"dən ayrılaraq öz şirkətləri olan "Zunpair Communication Technology"ni qurublar və oğurlanan çip texnologiyalarını öz kommersiya fəaliyyətlərində istifadə ediblər. Məhkəmə, "Huawei"ə məxsus intellektual mülkiyyət hüquqlarının qanunsuz istifadə edilməsi faktını müəyyən edib.

İstintaq nəticəsində ittiham olunan şəxslərə 6 ilədək həbs cəzası və pul cərimələri tətbiq edilib. Cərimələrin dəqiq məbləğləri açıqlanmayıb.

Xəbərin dərc olunduğu vaxta qədər məhkəmə qərarının tam mətni ictimailəşdirilməyib. Məhkumların hökmə etiraz edib-etməyəcəyi məlum deyil. "Huawei" nümayəndələri isə hökmü hələ şərh etməyiblər.

"HiSilicon Technologies Co." - "Huawei"nin yarımkeçirici məhsulların inkişafı üzrə ixtisaslaşmış bölməsidir. Şirkət istehlak elektronikası, rabitə vasitələri və optik cihazlar üçün inteqral sxemlər hazırlayır.

Paşa Məmmədli