Hökumət Ödəniş Portalı üzrə toplanan ödənişlərin həcmi AÇIQLANDI

Hazırda Hökumət Ödəniş Portalına (HÖP) 11 mərkəzi icra hakimiyyəti orqanı, 4 kommunal xidməti müəssisəsi, 5 stasionar və mobil rabitə operatoru, 114 məhkəmə orqanı, 19 sığorta şirkəti, 1438 bələdiyyə orqanı və digər social əhəmiyyətli qurumlar inteqrasiya olunub. 

Valyuta.az Mərkəzi Banka istinadən xəbər verir ki, HÖP-ə inteqrasiya olunmuş qurumlar üzrə 800-dən çox xidmət üzrə ödənişlərin toplanması təmin olunur. 

Bu xidmətlər üzrə ödənişlər 26 bank və “Azərpoçt” MMC-nin 2500-dən çox filial və şöbələrində, 1300-ə yaxın ödəniş terminalında nağd və nağdsız formada aparıla bilər. 

HÖP üzərindən 2020-ci il ərzində həyata keçirilən əməliyyatların ümumi həcmi 3.3 mlrd. manat təşkil edib və bu əməliyyatların 54%-i nağdsız formada aparılıb. 

Qeyd edək ki, aparılan nağdsız əməliyyatların həcmi 2019-cu il ilə müqayisədə 22% artıb.

Rövşən Ziya