Həbsxanada hazırladığı resept indi ona milyonlar qazandırır - SƏHƏR OXUSU

Peşəkar basketbolçu və ipoteka meneceri kimi karyera quran Sandberq (Seth Sundberg), 2009-cu ildə vergi fırıldağı ittihamı ilə həbs olunaraq beş ilini federal həbsxanada keçirdi.

Valyuta.az xəbər verir ki, həbsxanada gündəlik yeməklərin keyfiyyətsizliyi onu öz qranola batonlarını hazırlamağa vadar edib. Yulaf, bal və fıstıq yağından hazırladığı bu batonlar qısa müddətdə populyarlıq qazanıb və ona ayda təxminən 200 dollar qazanc gətirib. Bildirilir ki, bir dəfə 3 min ədəd baton sataraq 1300 dollar xalis gəlir də əldə edib.

Azadlığa çıxdıqdan sonra o, "Defy Ventures" adlı təşkilatın dəstəyi ilə bu ideyanı biznesə çevirib və məhsuluna "Prison Bars" adını verib. Bu ad həm batonlara, həm də həbsxana barmaqlıqlarına işarə edir. Şirkət orqanik, qlütensiz və GMO-suz batonlar istehsal etməklə yanaşı, keçmiş məhkumlara da iş imkanı yaradır. İlk dövrlərdə altı nəfərlik komandanın dörd üzvü sabiq məhkum olub.

"Prison Bars" məhsulları San-Fransiskoda mağazalara çıxarılıb və "Bi-Rite Grocers" kimi zəncirlərdə satılıb. Hətta "Google" ilə əməkdaşlıq da müzakirə olunub.

2017-ci ildə şirkətin illik gəliri 1 milyon dollardan az olsa da, sosial təsiri böyük olub. Sandberqin əsas məqsədi sadəcə biznes qurmaq deyil, keçmiş məhkumlara ikinci şans vermək idi. "Prison Bars" bu gün həm dadlı qəlyanaltı, həm də həyatını sıfırdan quran insanların gücünü simvolizə edən sosial biznes nümunəsi kimi diqqət çəkir.

Mayya Hüseynova