"Google" yeni tip klaviatura təqdim etdi - VİDEO

"Google Japan" komandası adi düymələri olmayan, tamamilə yeni tip eksperimental klaviaturanı təqdim edib.

Valyuta.az xəbər verir ki, bu modeldə yazı yığmaq üçün klassik disklı telefonlardakı kimi fırlanan disklərdən istifadə olunur.

Layihənin əsas ideyası mətn daxil etməni konsentrik disklərin paralel fırlanması vasitəsilə idarə etməkdir. Şirkətin bildirdiyinə görə, bu üsul əllərdəki gərginliyi azaldır, səhvlərin sayını minimuma endirir və hər fırlanma zamanı “rahatladıcı retro səs” yaradır.

Klaviaturanın dizaynı istəyə uyğun dəyişdirilə bilər ki, o, interyerlə harmoniyada olsun. Bundan başqa, komanda maraqlı aksesuar da təqdim edib – videozəngləri idarə etmək üçün disk telefon üslubunda hazırlanmış siçanaltı dayağı.

"Gboard Dial Edition" üçün bütün cizgilər və yığım təlimatları "GitHub" platformasında açıq şəkildə paylaşılıb. Paketə 3D çap modelləri, elektron sxemlər, detalların siyahısı və montaj üzrə təlimat daxildir.

Bu, "Google"un Yaponiya bölməsinin artıq ənənəyə çevrilmiş oktyabr layihələrindən biridir. Şirkət hər il qeyri-adi klaviaturalar hazırlayır və bütün planları ictimaiyyətə açıq şəkildə təqdim edir ki, texnologiya həvəskarları cihazı özləri yığa bilsinlər.

Daha əvvəl komanda Möbius lentinə əsaslanan klaviatura, əyilə bilən qaşıq formalı idarə sistemi, Morze əlifbalı model və dəqiqlik sevərlər üçün xətt şəklində klaviatura hazırlamışdı.

Paşa Məmmədli