Ən yaxşı biznes ideyaları niyə əvvəlcə rədd edilir?

Biznes dünyasında geniş yayılmış bir fikir var: uğurlu layihəyə başlamaq üçün əvvəlcə investorların, ekspertlərin və ya bazarın dəstəyini qazanmaq lazımdır. Bir çox sahibkar məhz bu təsdiqi gözlədiyi üçün perspektivli imkanları əldən verir. Halbuki tarix göstərir ki, ən uğurlu biznes ideyalarının bir çoxu əvvəlcə “bu mümkün deyil” cavabı ilə qarşılanıb.

ABŞ-da fəaliyyət göstərən “Roof Maxx” şirkətinin həmtəsisçisi Mayk Fizel hesab edir ki, insanların “xeyr” deməsi bəzən problemin həllinin mümkün olmadığını deyil, sadəcə olaraq həmin həllin hələ tapılmadığını göstərir. Onun sözlərinə görə, sahibkarlar qarşılarına çıxan ilkin maneələri son qərar kimi deyil, araşdırılması lazım olan çağırışlar kimi qəbul etməlidirlər.

Fizel və qardaşı Todd “Roof Maxx” şirkətini yaradana qədər yaşayış evlərinin dam örtüklərinin tam dəyişdirilmədən bərpası bazarda geniş yayılmış xidmət deyildi. Sənayedə əsas diqqət köhnə damların dəyişdirilməsinə yönəlmişdi, çünki bu xidmət podratçılar üçün daha yüksək gəlir gətirirdi. Nəticədə, ev sahiblərinə daha sərfəli alternativlər təklif olunmurdu.

Şirkətin hazırladığı xüsusi bərpa texnologiyası dam örtüklərinin xidmət müddətini uzatmağa imkan verdi. Bu yanaşma həm ev sahibləri üçün xərcləri azaltdı, həm də podratçılara yeni xidmət növü təqdim etmək imkanı yaratdı. Beləliklə, uzun illər ərzində həll olunmaz hesab edilən problem praktik həllini tapdı.

Müəllif vurğulayır ki, biznesə başlamaq istəyən şəxslər riskləri müəyyənləşdirməli və onları diqqətlə araşdırmalıdırlar. Lakin potensial təhlükələrin mövcudluğu ideyadan imtina etmək üçün əsas olmamalıdır. Əksinə, həmin maneələrin həqiqətən keçilməz olub-olmadığını yoxlamaq vacibdir.

Onun fikrincə, bir çox insanlar ilk mənfi rəy, uğursuz sınaq və ya bazarda dolaşan şayiələr səbəbindən perspektivli layihələri yarımçıq qoyurlar. Halbuki uğursuz ilk cəhd hər zaman ideyanın qeyri-real olduğunu göstərmir. Bəzən uğura aparan yol məhz ilk uğursuzluqlardan sonra başlayır.

Mayk Fizel hesab edir ki, bazarda dəyişiklik etmək istəyən sahibkarlar mövcud oyunçuların müqaviməti ilə qarşılaşmağa hazır olmalıdırlar. Bu müqavimət ruhdan salmaq əvəzinə, bazarın zəif tərəflərini və yeni imkanları üzə çıxara bilər. Eyni zamanda, yeni ideyanın üstünlükləri sübuta yetirildikdən sonra əvvəlki tənqidçilərlə əməkdaşlıq qurmaq da vacibdir.

Onun sözlərinə görə, sahibkarlar “xeyr” cavabını son nöqtə kimi deyil, yeni imkanların başlanğıcı kimi qəbul etməlidirlər. Çünki bir çox hallarda “həll yolu yoxdur” ifadəsi sadəcə olaraq “hələ heç kim həll yolunu tapmayıb” mənasını verir. Uğurlu bizneslərin əhəmiyyətli hissəsi də məhz bu düşüncə tərzinin nəticəsində yaranıb.

Tənzilə Ağabalayeva