Ən uğurlu CEO-ların oxu siyahısı: Yüksəliş üçün 6 vacib kitab - SƏHƏR OXUSU

Uğurlu lider olmaq üçün vacib vərdişlərdən biri də kitab oxumaq və daim inkişaf etməkdir. Məhz bu vərdişi həyatının ayrılmaz hissəsinə çevirən biznes liderləri karyerasına yeni başlayan gənclərə təkcə şəxsi təcrübə və mentorluqla deyil, həm də kitab tövsiyələri ilə yol göstərirlər. Uarren Baffettdən Bil Qeytsə, Ken Qriffindən Uitni Vulf Herdə qədər dünyanın ən tanınmış CEO-ları gənc oxucular üçün seçdikləri əsərləri paylaşaraq, uğurun açarını “dərin oxumaqda” görürlər.

Valyuta.az xəbər verir ki, bu kitablar liderlik, idarəetmə, innovasiya və şəxsi inkişaf mövzularını əhatə edir və karyeranın başlanğıcında olanlar üçün əsl bələdçi rolunu oynayır.

Uğurlu CEO-ların tövsiyə etdiyi kitablar

Cim Kollinzin yazdığı “Good to great: Why some companies make the leap and others don’t” adlı kitab uğurlu şirkətlərin sirrini açır. Müəllif göstərir ki, düzgün insanlarla işləmək mükəmməl planlardan daha vacibdir. Kitabda təqdim olunan “Əvvəl kim, sonra nə?” konsepti biznes idarəçiliyində dönüş nöqtəsi hesab olunur.

Con Bruksun yazdığı “Business Adventures” adlı kitab korporativ həyatın 12 klassik hekayəsini təqdim edir. Burada “Xerox”un yüksəlişi, “Ford Edsel”in uğursuzluğu kimi nümunələr uğur və iflasın arxasında dayanan liderlik qərarlarını göstərir. Bil Qeyts bu kitabı “indiyə qədər oxuduğum ən yaxşı biznes kitabı” adlandırır.

Erik Risin yazdığı “The Lean Startup” adlı kitab sahibkarlara minimal resurslarla bazara çıxmağın yollarını izah edir. Burada “minimum viable product” – yəni, ən sadə işlək məhsul anlayışı, biznes dünyasında çevik innovasiyanın təməli kimi təqdim olunur.

Nikolas Kristofun yazdığı "Chasing hope” adlı kitab müəllifin jurnalist kimi qlobal böhranlarda gördüyü işlərdən bəhs edir. Burada ümidin insanların həyatında motivasiya mənbəyinə çevrilməsi xüsusi vurğulanır. Bil Qeyts bu əsəri “ilhamverici xatirə” adlandırıb. 

Adam Qrantın yazdığı “Originals: how non conformists move the world” adlı kitab qeyri-ənənəvi düşünən insanların dünyada dəyişikliklər yaratmaq gücünü göstərir. “Bumble” şirkətinin CEO-su Uitni Vulf Herd bu əsəri xüsusilə gənc liderlərə tövsiyə edir.

Endi Qrouvun yazdığı "High output management” adlı kitab idarəetmənin əsaslarını sadə və praktik dillə izah edir. Müəllifin əsas mesajı odur ki, idarəetmədə nəticə (output) səyin (effort) üzərində dayanmalıdır. “Airbnb” şirkətinin CEO-su Brayan Çeski bu kitabı gənc sahibkarlara tövsiyə edib. 

Sərvanə Rəmixanova