Əmlak eksperti 94 milyarderdən öyrəndiklərini açıqlayıb

Məşhur daşınmaz əmlak eksperti Ryan Serhant, "Netflix" platformasında yayımlanan "Owning Manhattan" serialı ilə tamaşaçıların diqqətini cəlb edib. “SERHANT” adlı öz agentliyinə rəhbərlik edən Serhant, yalnız satış uğurları ilə deyil, həm də milyarderlərlə qurduğu münasibətlər və onların vərdişlərindən öyrəndikləri ilə gündəmə gəlib.

Valyuta.az xəbər verir ki, onun sözlərinə görə, bir il ərzində əldə etdiyi 22 milyon dollar gəlir və 94 milyarder ilə tanışlıq ona böyük təcrübə qazandırıb.

Bu şəxslərlə ünsiyyətdə olduğu zaman fərq etdiyi əsas nüanslardan biri onların zamanı necə idarə etməsi olub. Serhant bildirir ki, milyarderlər üçün zaman ən dəyərli varlıqdır. Onların davranışlarında da bu özünü göstərir.

O, bir nümunə kimi 1 milyard dollar sərvətə sahib bir iş adamı ilə getdiyi yeməyi xatırlayır. Həmin şəxsin yeməyi əvvəlcədən planlaşdırdığını, menyuya baxmadan sadəcə “ən yaxşısı nədirsə, onu gətirin” dediyini və qərarsızlıq göstərmədiyini bildirir. Həmçinin, milyarderlərin ümumiyyətlə telefonda danışmadığını, hər şeyi qısa mesajlarla həll etdiklərini qeyd edir. Serhant deyir ki, bir dəfə 134 milyon dollarlıq razılaşmanı sadəcə mesaj yazışması ilə bağlamışam, özü də “ürək emojiləri” ilə.

Uğurlu danışıqlar və satış strategiyası barədə fikirlərini bölüşən Serhantın əsas mesajı belədir: “Çox insan qazanmağa oynadığı üçün uduzur. Əgər yalnız öz qazancını düşünürsənsə, əslində itirirsən. Əgər qarşı tərəfin qazandığını təmin edə bilsən, sən də avtomatik olaraq qazanırsan”. Onun fikrincə, bu yanaşma insanı "banka qədər gülərək aparır".

Maliyyə sahəsində aldığı ən yaxşı tövsiyə isə məşhur reper Jay Z‑dən gəlir: “Qorxaq oynayan, pul qazanmaz”. Bu fikri öz həyat fəlsəfəsinə çevirən Serhant, xüsusilə gənclərə verdiyi tövsiyədə bacarıqların önəmini vurğulayır. Onun sözlərinə görə, əgər satış sahəsində çalışırsansa, sənin məhsulun bacarıqlarındır. Bu bacarıqlar sənə daha çox imkan qazandırır, insanlar sənə müraciət edir: “Gəl, mənimkini də sat”.

Lakin bu gün bacarıqlarla yanaşı diqqət çəkməyi bacarmaq da böyük əhəmiyyət daşıyır. Serhant deyir: “Hazırda kim daha çox diqqət çəkirsə, o daha çox qazanır. Bu diqqəti bacarıqlarınla birləşdirsən, uğur sənindir”.

Mayya Hüseynova