Elektrikli avtomobillər üçün yeni sürət rekordu: 431,62 km/saat - VİDEO

Çin elektrikli avtomobil istehsalçısı BYD tamamilə elektriklə işləyən yeni super avtomobili ilə sürət rekorduna imza atıb. 

Valyuta.az xəbər verir ki, şirkətin "Yangwang U9 Track Edition" adlı modelinə aid test, 8 avqust 2025-ci ildə Şimal Almaniyadakı ATP Automotive Test Papenburg poliqonunda keçirilib. Avtomobil 472,41 km/saat maksimal sürətə çataraq elektrikli nəqliyyat vasitələri üzrə əvvəlki 431,62 km/saatlıq rekordu geridə qoyub.

Sözügedən rekord iyul ayında "Rimac Nevera R" tərəfindən qeydə alınmışdı. "Yangwang U9 Track Edition" isə 2 min 960 at gücü və hər ton üçün 1 341,5 at gücü güc-çəki nisbəti ilə bu nəticəni aşmağı bacarıb.

Yeni model, ötən il bazara çıxarılan 1 300 at gücündəki tam elektrikli "Yangwang U9"un davamı hesab olunur. "Track Edition" standart modelin aerodinamik quruluşunu qoruyaraq oxşar dizayna malikdir. Avtomobil dörd müstəqil elektrik mühərriki və dörd təkərdən fırlanma anı idarəetmə sistemi ilə təchiz olunub. Bundan başqa, xüsusi gövdə idarəetmə sistemi sayəsində sürətlənmə, yavaşlama və döngələrdə avtomobil sabitliyini saxlayır.

Şirkətin nümayəndələri bildiriblər ki, "Blade Battery" adlı litium dəmir fosfat batareyası dəyişməz düzbucaqlı forması ilə səmərəli soyutma və yüksək enerji sıxlığı təmin edir. Bu batareya cəmi yarım saatda 30 faizdən 80 faizə qədər doldurula bilir.

Rekorda nail olmaq üçün mühəndislər həm akkumulyator, həm də mühərrik üçün ekstremal şəraitə uyğunlaşdırılmış istilik idarəetmə sistemi hazırlayıblar. Eyni zamanda, "dünyanın ilk seriyalı istehsal 1200V ultra yüksək gərginlikli avtomobil platforması" da sistemə əlavə edilib.

Paşa Məmmədli