"Delvitech" 40 milyon dollar sərmayə aldı

İsveçrədə yerləşən, süni intellekt dəstəkli sənaye avtomatlaşdırma texnologiyaları üzrə ixtisaslaşan "Delvitech" şirkəti B seriyalı investisiya turunda 40 milyon dollar sərmayə cəlb edib. 

Valyuta.az xəbər verir ki, "Delvitech" cəlb olunan vəsaiti qlobal miqyasda, süni intellektlə təchiz olunmuş optik yoxlama texnologiyalarının genişləndirilməsi və xüsusilə Hindistanda yeni istehsalat müəssisəsinin yaradılması üçün istifadə edəcək.

2018-ci ildə Roberto Qatti tərəfindən təsis edilən "Delvitech", elektronika istehsalı sahəsində istifadə olunan 3D avtomatik optik yoxlama (AOI) sistemləri hazırlayır. Şirkət, istehsal xətlərində - xüsusilə çap olunmuş dövrə lövhələrindəki qüsurları yüksək dəqiqliklə aşkar edib təsnifləşdirməklə məhsul keyfiyyətini artırmağı hədəfləyir.

Süni intellekt texnologiyası ilə gücləndirilmiş platforma, plastik komponentlər, şəffaf yapışdırıcılar və mikro birləşdirici elementlər kimi aşkarlanması çətin olan materiallardakı qüsurları müəyyən edə bilir. Sistemin modul və miqyaslana bilən memarlığı, müxtəlif sənaye və bazarların ehtiyaclarına uyğunlaşdırıla bilər.

Xüsusilə avtomobil, telekommunikasiya, əczaçılıq, müdafiə və sənaye avtomatlaşdırması sahəsində fəaliyyət göstərən şirkətlər tərəfindən bu sistemlər, elektron istehsal proseslərində keyfiyyətə nəzarət üçün üstünlük təşkil edir. "Delvitech" özünü öyrənən süni intellekt alqoritmləri vasitəsilə istehsal mühitinə sürətlə uyğunlaşır və əllə proqramlaşdırma ehtiyacını minimuma endirir.

Mayya Hüseynova