ChatGPT rekorda imza atdı: Cəmi 1 saata 1 milyon yeni istifadəçi!

Gün boyu yeni təsvirlər yaratmaq istəyən istifadəçilər "OpenAI"nin yeni görüntü yaratma funksiyasını sınamaq üçün kütləvi şəkildə ChatGPT hesabı açırlar. "OpenAI"nin rəhbəri Sem Altmanın açıqlamaları və yaşananlar da bunu təsdiqləyir.

Valyuta.az xəbər verir ki, ChatGPT-yə əlavə edilən görüntü yaratma xüsusiyyəti süni intellektə olan marağı daha da artırıb. Bu yenilik "OpenAI"ın xidmətlərinə olan tələbi sürətlə artırmaqla yanaşı, istifadəçi kütləsini də genişləndirib.

Şirkət rəhbəri Sem Altman X platformasında paylaşdığı məlumata görə, yalnız bir saat ərzində 1 milyon yeni istifadəçi ChatGPT-yə qoşulub. Onların böyük əksəriyyəti isə məhz bu yeni funksiyanı sınamaq üçün qeydiyyatdan keçib.

Hazırda ChatGPT-nin görüntü yaratma xüsusiyyəti böyük maraq görür. Lakin bu vəziyyət sistemdə bəzi gecikmələrə səbəb olub. İstifadəçilərin yaratmaq istədikləri təsvirlər üçün cavab müddətində ləngimələr müşahidə olunur. Bu isə "OpenAI"ın gözlədiyindən daha çox maraqla qarşılaşdığını göstərir. Görünən odur ki, istifadəçilər bir-biri ilə yarışaraq fasiləsiz şəkildə ChatGPT-yə yeni rəsmlər çəkdirmək istəyirlər.

Əvvəlcə bu funksiyanın bütün istifadəçilər üçün əlçatan olması planlaşdırılırdı. Lakin "OpenAI"ın qarşılaşdığı yüksək tələbat səbəbindən görüntü yaratma xüsusiyyətinin yalnız ödənişli istifadəçilərlə məhdudlaşdırılması müzakirə edilir. Bununla yanaşı, yeni hesab yaratmaq istəyənlərin sayının sürətlə artması qeydiyyat proseslərində gecikmələrə səbəb olub.

"OpenAI" bu tələbi idarə etmək üçün bəzi məhdudiyyətlər tətbiq edir. Hazırda hər istifadəçiyə saatda yalnız bir görüntü yaratmaq imkanı verilir. Bu məhdudiyyət xidmətin istifadəsini çətinləşdirsə də, sistemin sabitliyini qorumağa yönəlmiş bir addım kimi qiymətləndirilir.

İstifadəçi marağı o qədər böyükdür ki, bu funksiyanı istifadə etmək artıq çətin bir prosesə çevrilib. "OpenAI"ın bu intensiv marağa necə uyğunlaşacağı və platformanı daha dayanıqlı hala gətirə biləcəyi yaxın zamanda geniş müzakirə olunacaq mövzulardan biri olacaq.

Paşa Məmmədli