Cəmi 4 ayda QR ödənişlərlə əməliyyat 119 min artıb

2026-cı ilin ilk 4 ayında fiziki şəxslər arasında həyata keçirilən köçürmələr (P2P) həm əməliyyat sayı, həm də məbləğ baxımından ödəniş ekosistemində dominant mövqeyini qoruyub.

Valyuta.az xəbər verir ki, bunu Azərbaycan Respublikası Mərkəzi Bankının baş proqram mühəndisi və Ödəniş Sistemləri Administratoru Tofiq Acırqayev Bakıda keçirilən “Beynəlxalq Maliyyə və Bankçılıq Sammiti 2026”da çıxışı zamanı bildirib.

Onun sözlərinə görə, ödənişlərin fiziki və hüquqi şəxslər üzrə köçürmələr, hesab-fakturalar, xəzinə əməliyyatları, əməkhaqqı və QR ödənişləri üzrə təhlili göstərir ki, 2025-ci ildə ödəniş mənzərəsi müxtəlif olsa da, bir neçə kateqoriya həcm baxımından ön plana çıxıb.

Tofiq Acirqayev qeyd edib ki, 2026-cı ildə kateqoriyalar üzrə struktur daha aydın formalaşıb. Belə ki, fiziki şəxslər arasında həyata keçirilən P2P köçürmələri ilk dörd ayın yekunlarına görə 19,3 milyon əməliyyatla ümumi əməliyyatların 95,5%-ni təşkil edib.

O, həmçinin QR ödənişlərində də əhəmiyyətli artım müşahidə olunduğunu vurğulayıb. Bildirilib ki, yanvar ayında qeydə alınan 23 min QR ödəniş əməliyyatı aprel ayında 142 minə yüksəlib. Bununla da, 4 ay ərzində QR ödənişlərinin sayı təxminən 6 dəfəyə yaxın artıb.

Rəfiqə Abdin