Bu qurumların avtomobilləri hərraca çıxarılır - Qiymətlər 2 min manatdan başlayır

İqtisadiyyat Nazirliyi yanında Əmlak Məsələləri Dövlət Xidməti (ƏMDX) müxtəlif dövlət qurumlarına məxsus 54 nəqliyyat vasitəsini açıq hərraca çıxarılacaq.

Valyuta.az xəbər verir ki, hərraca çıxarılan maşınlar arasında Azərbaycan Respublikası Dövlət Gömrük Komitəsinə məxsus start qiyməti 24 min 250 manatla başlayan müxtəlif markalı 18 avtomobil də yer alır.

Eyni zamanda Azərbaycan Respublikasının Strateji Obyektlərin Mühafizəsi Dövlət Agentliyi eyni markalı - "MITSUBISHI L200" markalı 33 minik avtomobilini hərraca çıxaracaq. Hərraca çıxarılan nəqliyyat vasitələrini start qiyməti 196 min 100 manat təşkil edir. 

Sözügedən hərracda nəqliyyat vasitələrini satışa çıxaran qurumlardan biri Azərbaycan Respublikası Dövlət Təhlükəsizliyi Xidmətidir. Satışda olan avtomobil markalarından biri "LAND ROVER DEFENDER" minik avtomobilidir. Bu nəqliiyat vasitəsi üçün təyin olunmuş qiymət 18 000 manatdır. Qurumun satışda olan bir digər avtomobili isə 2000 manat təyin olunmuş "CITROEN C ELYSEE" minik avtomobilidir. 

Sonuncu qurum isə Azərbaycan Respublikası Ağdam Rayon İcra Hakimiyyətinə məxsus "CHEVROLET NIVA MİNİK" markalı avtomobilidir. Onun üçün təyin olunmuş qiymət isə 7800 manatdır. 

Qeyd edək ki, avtomobillərin hərracı üçün təyin olunmuş vaxt 16 sentyabr 2025-ci il saat 10:00-dur.

Sərvanə Rəmixanova