"Bona Dea" cərimələndi

"Bona Dea" Məhdud Məsuliyyətli Cəmiyyəti barəsində gömrük qaydaları əleyhinə olan (malların saxlanca qoyulması və saxlanc qaydalarının pozulması) inzibati xəta protokolu tərtib olunub.

Valyuta.az-ın məlumatına görə,  protokol İnzibati Xətalar Məcəlləsinin 496.1-ci maddəsi ilə irəli sürülüb və iş məhkəməyə göndərilib.

Məhkəmənin qərarı ilə, şirkət İnzibati Xətalar Məcəlləsinin 496.1-ci maddəsində nəzərdə tutulmuş inzibati xətanı törətməkdə təqsirli bilinib, 300 manat miqdarında inzibati qaydada cərimə edilib. 

Qeyd edək ki, İnzibati Xətalar Məcəlləsinin 496.1-ci maddəsinə görə,  malların saxlanca qoyulması və saxlanc qaydalarının (müddətlərinin) pozulmasına, o cümlədən gömrük və müvəqqəti saxlanc anbarlarında mallarla müxtəlif əməliyyatların aparılmasının müəyyən olunmuş tələblərinə və şərtlərinə riayət edilməməsinə görə fiziki şəxslər 50 manatdan 100 manatadək məbləğdə, vəzifəli şəxslər 150 manatdan 250 manatadək məbləğdə, hüquqi şəxslər 300 manatdan 500 manatadək məbləğdə cərimə edilir.

Xatıradaq ki, MMC Bakıda fəaliyyət göstərən məşhur “Liv Bona Dea Hospital”ın hüquqi adıdır.  Hospitalın baş direktoru Taner Özbekdir.

Sabiq İsbəndərli