"Kreditlə startapa başlamaq üçün xalis mənfəətin ən az 20 faiz olmalıdır" - Nicat Manafov

Startap qurmaq ideyadan reallığa gedən yolda ən çətin qərarların verildiyi mərhələdir. Xüsusilə də maliyyə məsələləri bu prosesin ən həssas nöqtələrindən biri sayılır. Bu yeni başlayan sahibkarlar üçün əsas məqamlardan biridir.

Startap üçün kredit götürmək, yoxsa investor tapmaq yaxşıdır?

Mövzu ilə bağlı Valyuta.az-a danışan sahibkar Nicat Manafov bildirib ki, mümkün qədər Azərbaycanda startaplar ilkin mərhələdə öz imkanları hesabına nələrsə etməyə çalışsınlar:

"Bu mümkün olmursa, Azərbaycanda investor axtarmağa çox vaxt sərf etməsinlər. Çünki ölkədə real startap investisiya mühiti demək olar ki, formalaşmayıb. Əgər maliyyə imkanı olan şəxslər varsa, bu halda bizneslərinə şərik cəlb etmələri daha məntiqli və praktik üsul hesab oluna bilər. Şərik tapmaq mümkün olmadıqda isə bank kreditləri müəyyən mənada dəstək rolunu oynaya bilər. Biznes quruculuğu mərhələsində kreditdən istifadə etmək mümkündür".

"Dünya praktikasında fərqli yanaşmalar olsa da, Azərbaycan reallığında ardıcıllıq adətən, belədir: ilk növbədə öz imkanlarınla nəsə etməyə çalışmalı, daha sonra şərik axtarmalısan. Çünki ölkədə nə investisiya mühiti kifayət qədər inkişaf edib, nə də aktiv startap investorları mövcuddur. Əgər bunlar da alınmırsa, bank kreditləri vasitəsilə biznesi böyütmək olar.
Lakin nəzərə almaq lazımdır ki, Azərbaycanda bank kreditlərinin faizləri yüksəkdir. Buna görə də bank krediti ilə biznesdən nəticə əldə etmək üçün xalis mənfəət marjası ən azı 20%-dən yuxarı olmalıdır" - deyə N. Manafov qeyd edib.

Tənzilə Ağabalayeva