"Dövlət proqramı çərçivəsində güzəştli maliyyələşmə alətlərinin əhatə dairəsi genişləndiriləcək"

Bakıda keçirilən “X Beynəlxalq Maliyyə və Bankçılıq Sammiti”ndə Azərbaycan Banklar Assosiasiyasının prezidenti Zakir Nuriyev çıxış edib.

Valyuta.az xəbər verir ki, Zakir Nuriyev çıxışı zamanı rəqəmsal transformasiya, ödəniş sistemlərində innovativ texnologiyaların tətbiqi və Türk dövlətləri arasında maliyyə inteqrasiyasının perspektivləri barədə danışıb.

O bildirib ki, rəqəmsal transformasiyanın sürətlənməsi, ani ödəniş sistemlərinin genişlənməsi, rəqəmsal bankçılıq və innovativ maliyyə həlləri Türk dövlətləri arasında maliyyə əməkdaşlığının inkişafı üçün yeni imkanlar yaradır.

Çıxış zamanı Azərbaycan bank sektorunun son göstəriciləri də təqdim olunub. Qeyd edilib ki, 2026-cı ilin aprel ayında bank sektorunun aktivləri ötən ilin müvafiq dövrü ilə müqayisədə 5 faiz artaraq 57,4 milyard manata çatıb. Bank sektorunun kredit portfeli isə 8,9 faiz artaraq 36 milyard manat təşkil edib.

Zakir Nuriyev aqrar sektorun maliyyələşdirilməsinin genişləndirilməsinin dövlət prioritetlərindən biri olduğunu vurğulayaraq bildirib ki, kənd təsərrüfatı və balıqçılıq sahələrinin inkişafına dair dövlət proqramı çərçivəsində aqrar kreditlər, sığorta mexanizmləri və güzəştli maliyyələşmə alətlərinin əhatə dairəsi genişləndiriləcək.

Tədbirdə bank sektorunun resurs bazasının gücləndiyi də diqqətə çatdırılıb. Bildirilib ki, depozit portfeli illik müqayisədə 2,8 faiz artaraq 37,8 milyard manata, fiziki şəxslərin depozitləri isə 18,7 faiz artaraq 17,3 milyard manata yüksəlib. Bununla yanaşı, depozitlər üzrə dollarlaşma səviyyəsinin azalması milli valyutaya və bank sisteminə etimadın artmasının göstəricisi kimi qiymətləndirilib.

Rəfiqə Abdin