Azərbaycan mobil internet sürətində geriləyib

Azərbaycanın mobil və sabit genişzolaqlı internet sürətinə görə dünya sıralamasındakı mövqeyi müəyyənləşib.

Valyuta.az xəbər verir ki, 2025-ci ilin yanvar–iyul aylarını əhatə edən hesabata əsasən, mobil internetdə Azərbaycanın orta sürəti 74,76 MB/s olub. Bu göstərici ilə ölkə 104 dövlət arasında 56-cı yerdə qərarlaşıb, ötən ilin eyni dövrü ilə müqayisədə isə Azərbaycan bir pillə geriləyib.

Siyahının lideri Birləşmiş Ərəb Əmirlikləri (584,97 MB/s), sonuncu isə Boliviya (14,70 MB/s) göstərilib.

Azərbaycan üzrə sabit genişzolaqlı internet üzrə isə müsbət dinamika müşahidə olunub.

Belə ki, ölkədə sabit genişzolaqlı internet üzrə orta sürət 82,58 MB/s təşkil edib ki, bu da ölkəni 153 dövlət arasında 81-ci pilləyə yüksəldib. Nəticə etibarilə Azərbaycan 2 pillə irəliləyib. Qlobal sıralamada Abu-Dabi (353,22 MB/s) birinci, Suriyanın Hələb şəhəri isə (2,73 MB/s) ilə sonuncu yerdə qərarlaşıb.

Bakı şəhəri üzrə göstəricilər də diqqət çəkib. Paytaxtın mobil internet sürəti 93,16 MB/s təşkil edərək 148 şəhər arasında 83-cü pilləyə yüksəlib.

Məlumata görə, qeyd edə bilərik ki, bu, ötən dövrlə müqayisədə 4 pilləlik irəliləyiş deməkdir. Sabit internetdə isə Bakı 83,27 MB/s sürət göstəricisi ilə 198 şəhər arasında 112-ci yerdə qərarlaşıb və 3 pillə irəliləyib.

Ümumilikdə, hesabat göstərir ki, Azərbaycan mobil internet sürətində geriləsə də, sabit genişzolaqlı internetdə müəyyən irəliləyiş əldə edib. 

Sərvanə Rəmixanova