Amerika tarifləri ABŞ xaricində inflyasiyanı azalda bilər - KİV

"The New York Times", "Fortune", "ABC News, "The Independent" və "Axios" Donald Trampın gömrük rüsumlarının dünya istehlak qiymətlərinə təsirini qiymətləndirib. 

Valyuta.az xəbər verir ki, iqtisadçılar arasında bu mövzuda kəskin fikir ayrılığı mövcuddur. Bəziləri hesab edir ki, idxal rüsumları qlobal inflyasiyanı artıracaq, digərləri isə bunun yükünü yalnız amerikalı istehlakçıların daşıyacağını düşünür.

The New York Times (Nyu-York, ABŞ)

Nəşr yazır ki, ABŞ iqtisadiyyatı hazırda “ağır və hərəkətsiz avqust gününü” xatırladır. Gözlənilən “fırtına” artıq bəzi göstəricilərdə özünü büruzə verir, lakin nəticələrin nə dərəcədə dağıdıcı olacağı hələ bəlli deyil.

Fortune (Boston, ABŞ)

Jurnal qeyd edir ki, Trampın tarifləri ABŞ-da qiymətləri yüksəltsə də, digər ölkələrdə müəyyən deflyasiya təsiri yarada bilər. Ən böyük zərbəni isə Çin hiss edəcək. ABŞ-ın Pekinə tətbiq etdiyi yüksək rüsumlar Çinin onsuz da zəif olan iqtisadiyyatını daha da çətin vəziyyətə sala, hətta deflyasiya şokuna səbəb ola bilər.

ABC News (Nyu-York, ABŞ)

Ekspertlər ayaqqabıdan pomidora qədər bir çox məhsulda qiymət artımı barədə xəbərdarlıq etsələr də, Trampın prezidentliyi dövründə inflyasiya əksinə, zəifləyib. Bunun səbəbi kimi şirkətlərin rüsumlar qüvvəyə minməmişdən əvvəl ucuz idxal mallarını ehtiyat etməsi göstərilir. Ancaq bu ehtiyatlar tükəndikcə qiymət artımı qaçılmaz olacaq. Yale Budget Lab hesablamalarına görə, tariflər ABŞ ailələrinə illik orta hesabla əlavə 2400 dollar xərc gətirəcək.

The Independent (London, Böyük Britaniya)

"LendingTree" şirkətinin araşdırmasına əsasən, ABŞ şirkətlərinin üçdə biri yaxın 6 ayda qiymətləri artırmağı planlaşdırır. Təxminən 65% qiymətləri sabit saxlamağı, 5% isə endirməyi gözləyir. Analitiklər qiymət artımının iş yerlərinin ixtisarına qədər gedə biləcəyini bildirirlər.

Axios (Arlinqton, ABŞ)

Nəşrin məlumatına görə, tariflərin təsiri artıq açıq şəkildə hiss olunur – əsas ərzaq və gündəlik tələbat mallarının qiymətləri kəskin artıb. ABŞ şirkətləri gömrük rüsumlarının yükünü daşıyır, halbuki administrasiya bunun ixracatçı ölkələrin üzərinə düşəcəyini iddia edirdi. Lakin ötən ay idxal qiymətləri sürətlə yüksəlib ki, bu da “xərcləri əcnəbilər ödəyəcək” tezisini şübhə altına alır.

Paşa Məmmədli