Aldığınız evin başqalarına da satılmadığından əmin olmaq üçün buna diqqət edin

Ev və mənzil alışı-satışı zamanı alıcılar müxtəlif problemlərlə üzləşirlər. Bir mənzil və ya ev bir yox, bir neçə insana satıla bilir və bu zaman insanlar arasında narazılıqlar yaranır. Uzun illərdir bu problem yaşanır və yenə də bu halları görürük.

Bəs belə halların qarşısını necə almaq olar?

Hüquqşünas Şamil Paşayev Valyuta.az-a açıqlamasında bildirir ki, alqı-satqı zamanı bu hallar daha çox MTK-larda baş verir:

“Ev və mənzil alqı-satqısında bir yox, bir neçə şəxsə eyni evin satılması məsələsi xüsusən MTK-larda baş verir. Bu cür halların yaşanmaması üçün vətəndaşlar həmin MTK-ların həqiqətən mövcud olub-olmadığına əmin olmalıdır. Qanunvericilikdə əslində bununla bağlı dəyişiklik də mövcuddur. Mülki Məcəllənin tələblərinə əsasən, bu alqı-satqılar notariat qaydada həyata keçirilə bilər. Notariat qaydada olduqda, alınan və satılan evlərin həqiqətən kimin adına olduğu, əvvəl satılıb-satılmadığı müəyyən edilə bilər. Satılacaq evlər notariata infoqrafika şəklində təqdim edilir. Bu cür olarsa, vətəndaşlar evlərini rahatlıqla ala və sata bilərlər, çünki artıq dövlət qurumu tərəfindən tənzimləmə həyata keçirilir və adiyyatı quruma satışlar və alışlar barədə məlumat verilir”.

“Əgər alış notariat qaydada aparılmayıbsa, ev və mənzil eyni vaxtda bir neçə adama satılıbsa, bu zaman zərərçəkmiş şəxslər məhkəməyə müraciət edə və təzminat ala bilərlər. Eyni zamanda hüquq-mühafizə orqanlarına müraciət edərək həmin dələduzların cinayət məsuliyyətinə cəlb olunmasını təmin edə bilərlər” - deyə Ş.Paşayev bildirdi.

Tənzilə Ağabalayeva