ABB-nin problemli kreditlərində artım 3 bankın balans kapitalını üstələyib - Rəqəmlər

Son bir ildə Azərbaycan Beynəlxalq Bankının (ABB) problemli kreditləri (PK) 47% artıb.

Valyuta.az-ın hesabatlara əsasən verdiyi məlumata görə, 2025-ci ilin ilk yarısında ABB-nin problemli kreditlərinin (90 gündən artıq gecikdirilən kreditlər) həcmi ötən ilin eyni dövrü ilə müqayisədə 73,7 milyon manat artaraq 231,1 milyon manata yüksəlib. Müqayisə üçün, bu göstərici 2024-cü ilin ilk yarısında 157,4 milyon manat təşkil edib.

Problemli kreditlərdəki artıma baxmayaraq, onların bankın ümumi kredit portfelində çəkisi hələ də nisbətən aşağıdır. Belə ki, 2024-cü ilin ilk yarısında portfeldəki payı 2,71% olan problemli kreditlər 2025-ci ilin ilk yarısında 3,49%-ə yüksəlib.

Əldə olunan göstəricilərə əsasən, problemli kreditlərin əsas hissəsi istehlak və biznes kreditləri üzrə qeydə alınıb. Belə ki, istehlak kreditləri üzrə PK bir ildə 48% artaraq 131,2 milyon manata çatıb (2024: 88,3 milyon manat). Biznes kreditləri üzrə problemli borclar 69% artaraq 82,3 milyon manat təşkil edib (2024: 48,6 milyon manat). Daşınmaz əmlak kreditləri üzrə PK isə 9,6% azalaraq 18,6 milyon manata enib (2024: 20,5 milyon manat).

Gecikmə müddətinə görə təhlil göstərir ki, problemli portfelin ən böyük hissəsi ümidsiz kreditlər, yəni “1 il və artıq” gecikdirilən borclardan ibarətdir. Bu kateqoriya 2025-ci ilin ilk yarısında 133,0 milyon manat olub ki, bu da ümumi problemli kreditlərin 57%-ni təşkil edir (2024: 66%).

Ümumilikdə, son bir il üzrə ABB-də problemli kreditlərin məbləği və portfeldə payında artım müşahidə olunub. Əsasən istehlak və biznes kreditləri üzrə risklərin yüksəlməsi bankın gələcək kredit siyasətində bu seqmentlərə nəzarətin gücləndirilməsini zəruri edir.

Qeyd edək ki, bu ilin ilk yarısı üzrə rəqəmlərə əsasən, Azərbaycanda 3 bankın balans kapitalı 75 mln. manata qədər olub. Başqa sözlə, ABB-nin problemli kreditlərinin artım dinamikası 3 bankın balans kapitalından çoxdur.

Nara