150 milyon dollarlıq viski imperiyası - 20 Ginnes rekordu

Vyetnamlı kolleksiyaçı Nquyen Dinh Tuan Viet nadir spirtli içkilər sahəsində inanılmaz uğura imza atıb. O, 20 fərqli kateqoriya üzrə Ginnesin dünya rekordlarını qazanaraq, bu sahədə ən çox rekord əldə edən şəxsə çevrilib. 

Valyuta.az xəbər verir ki, onun nadir içkilərdən ibarət kolleksiyasının ümumi dəyəri isə 175 milyon dollar qiymətləndirilir.

Tarixin qoruyucusu

Vietin topladıqları sadəcə bahalı içkilər deyil, o, 30 il ərzində dünyanın ən nadir viski, konyak, armaniyak və rom nümunələrini bir araya gətirib. Kolleksiyasında 5 ədəd "Macallan 1926" - 60 illik butulka, həmçinin dünyanın ən qədim konyakı və digər unikal nümunələr də yer alır.

O, bu işi bir sərmayə kimi deyil, tarixi mirasın qorunması kimi görür:

“1696-cı il istehsalı Jules Robin konyakını əlimdə tutanda sadəcə butulka tutmuram, yox olmuş bir əsrin yaddaşına toxunuram. Mən bu içkilərin sahibi deyiləm, onların qoruyucusuyam”.

İki möhtəşəm rekord

Vietin 20 rekordundan ikisi xüsusilə diqqət çəkir:

Dünyanın ən dəyərli viski kolleksiyası
Dünyanın ən dəyərli konyak kolleksiyası

Onun 1.200-dən çox butulkadan ibarət viski kolleksiyası 150 milyon dollar dəyərindədir. Burada iki tam “Macallan Fine & Rare seriyası”, həmçinin kolleksiyaçıların “müqəddəs kasası” sayılan “Macallan 1926” butulkaları da yer alır.

Konyak kolleksiyası isə 700 butulka və 25 milyon dollar dəyərindədir. Burada dünyanın ən qədim konyakı və Fransanın ən prestijli istehsalçılarının on illərlə üzə çıxmayan nümunələri saxlanılır.

Viet düşünür ki, pul zamanı geri qaytarmır, amma butulka o zamandan bir parçanı qoruyub saxlayır.

Sərvanə Rəmixanova