150-dən çox süni intellekt modelini birləşdirən startap: "Eachlabs"

Tək bir API inteqrasiyası ilə 150-dən çox süni intellekt modelinə çıxış imkanı təqdim edən "Eachlabs", hazır iş axını şablonları, model müqayisə alətləri və "AI Finder" funksiyası ilə seçilir. Valyuta.Az-ın verdiyi xəbərə görə, 2024-cü ilin fevral ayında Türkiyədə Eftal Yurtseven, Ferhat Budak və Canberk Sinangiltərəfindən təsis edilən "Eachlabs", qlobal tərtibatçıların məhsuldar süni intellekt texnologiyalarına daha asan və sürətli çıxışını təmin etməyi hədəfləyir. Hazırda səkkiz nəfərlik əsas komandaya malik olan layihə proqram təminatı və məhsul strategiyası kimi sahələrdə fəaliyyət göstərən mütəxəssisləri bir araya gətirir.

Startapın fəaliyyət sahəsi

Komanda "Eachlabs"i tərtibatçılara yönəlmiş süni intellekt modelləri üçün bazar yeri kimi təqdim edir. Platforma tək bir API inteqrasiyası ilə 150-dən artıq süni intellekt modelinə çıxış imkanı yaradır. Burada yer alan hazır iş axını şablonları, model müqayisə alətləri və "AI Finder" funksiyası tətbiq hazırlama prosesini xeyli asanlaşdırır. Musiqi istehsalından vizual tərtibata, mətndən videoya qədər geniş spektrli modellər tək platformada birləşdirilir.

Komanda, infrastrukturun tamamilə sıfırdan qurulduğunu və ilkin versiyanın cəmi üç ayda istifadəyə verildiyini qeyd edir. "Eachlabs"in infrastrukturu miqyaslana bilən memarlığa əsaslanır və istifadəçilər yalnız istifadə etdikləri xidmətə görə ödəniş edirlər.

Startapın təqdim etdiyi məlumata əsasən, son altı ay ərzində istifadəçi bazasını beş dəfə artıran "Eachlabs", bu gün 80 ölkədə 10 mindən çox tərtibatçıya çatıb. Platformada 150-dən çox model aktiv şəkildə istifadə olunur.

Süni intellekt bazarında qlobal miqyasda "Replicate" və "Fal" kimi oyunçular fəaliyyət göstərir. "Eachlabs" isə avtomatik model seçimi, hazır iş axını şablonları, çıxış keyfiyyəti və sürət sahələrində rəqiblərindən fərqləndiyini vurğulayır. Platformanın avtomatik model seçimi funksiyası vasitəsilə istifadəçilərə ehtiyaclarına ən uyğun model təklif olunur.

Hazır iş axını şablonları ilə arxa fonun silinməsi, mətndən videoya çevirmə kimi funksiyalar sürüklə-burax rahatlığında həyata keçirilə bilir. Eyni zamanda modellər cavab müddəti, maliyyət və keyfiyyət baxımından müqayisə olunur və ən optimal nəticə ən qısa zamanda təqdim edilir. Bundan əlavə, "ByteDance" kimi texnologiya nəhəngləri ilə qurulan inteqrasiyalar vasitəsilə tərtibatçılara genişmiqyaslı və aktual modellər təqdim olunur.

Startapın gəlir modeli

"Eachlabs", "Boost The Future" sürətləndirmə proqramının 6-cı buraxılışından məzun olan 10 startapdan biridir. Bundan əlavə, 2025-ci ilin fevral ayında "Right Side Capital"ın rəhbərliyi ilə toxum öncəsi investisiya alması ilə gündəmə gəlmişdi.

İstifadə qədər ödəniş modelilə fəaliyyət göstərən "Eachlabs" vasitəsilə tərtibatçılar tək bir inteqrasiya ilə müxtəlif modellərə çıxış əldə edir və yalnız istifadə etdikləri qədər ödəniş edirlər. Korporativ istifadəçilər üçün isə miqyaslana bilən fərqli paketlər təklif olunur.

Startapın hədəfləri

Komanda yaxın aylarda "AI Finder" funksiyasını bütün istifadəçilər üçün aktivləşdirməyi planlaşdırır. Bu yolla istifadəçilər öz tətbiqləri üçün ən uyğun modeli daha sürətli şəkildə seçə biləcəklər. "Eachlabs" xüsusilə media və məzmun istehsalı sahəsində məhsuldar süni intellekt modellərinə fokuslanmağı qarşısına məqsəd qoyub. Layihənin uzunmüddətli vizyonu, İstanbulda qurulan bu təşəbbüsün qlobal tərtibatçı ekosistemində etibarlı süni intellekt infrastruktur platformasına çevrilməsidir.

Aydın