ABŞ-da hazırda təxminən 4,000 kommersiya bankı fəaliyyət göstərir. Onlayn bankçılıq imkanları müştərilərə daha geniş məhsul və xidmətlərə çıxış imkanı verir. Lakin bu qədər çox seçim arasında bank seçmək çətin ola bilər.

"J.D. Power"ın 2024-cü il ABŞ Milli Bank Məmnuniyyəti Araşdırması məhz bu məqsədi güdüb. Bu araşdırma 11,066 pərakəndə bankçılıq müştərisini sorğulayaraq doqquz milli bankı 1 000 ballıq şkala üzrə qiymətləndirib. Tədqiqatda orta bal 658 olub və ən yüksək bal 689 təşkil edib.

Valyuta.az müştəri məmnuniyyətinə əsasən ən yaxşı hesab olunan üç milli bank haqqında əsas məlumatları təqdim edir:

Müştəri məmnuniyyətinə görə ABŞ-ın ən yaxşı bankları

"J.D. Power" araşdırmasında banklar aşağıdakı yeddi kateqoriya üzrə qiymətləndirilib:

• Etibar
• İnsan resursları
• Hesab təklifləri
• Müştərilərə necə və nə zaman bank əməliyyatlarını icra etmək imkanı verməsi
• Vaxta və pula qənaət
• Rəqəmsal kanallar
• Problemləri və ya şikayətləri həll etmə

Bu yeddi kateqoriyanın ümumi nəticəsi bankın balını müəyyən edib, burada “etibar” ən çox ağırlığa malik amil olub.

1. "Capital One" (bal: 689)

"Capital One" ABŞ-da aktivlərə görə doqquzuncu ən böyük bankdır. Bu bank digər iri banklardan fərqli olaraq, nisbətən yeni sayılır – 1994-cü ildə Virciniyanın Riçmond şəhərində yaradılıb.

Bu gün "Capital One" müxtəlif məhsullar təklif edir: kredit kartları, çek və əmanət hesabları, avtomobil kreditləri və biznes kredit kartları kimi xidmətlər. Bank, yüksək faizli əmanət hesabları və "Venture" kredit kartları ilə məşhurdur.

2. "Chase" (bal: 677)

"Chase" ABŞ-ın ən böyük bankıdır. Adını ilk dəfə 1877-ci ildə yaradılmış "Chase National Bank"dan almışdır. Lakin bankın tarixi 1799-cu ilə, "Manhattan Bankı"nın yaradılmasına qədər gedib çıxır.

Hazırda "Chase" kredit kartları, ipoteka kreditləri, çek və əmanət hesabları, avtomobil kreditləri kimi müxtəlif məhsullar təklif edir. Bank "Chase Ultimate Rewards" xallarını qazandıran kredit kartları və 4,700-dən çox filialı ilə tanınır.

3. "TD Bank" (bal: 668)

"TD Bank" aktivlərə görə ABŞ-ın onuncu ən böyük bankıdır, lakin onun ana şirkəti Kanadanın Toronto şəhərində yerləşir. Bankın əsası 1855-ci ildə "Toronto Bankı" adı ilə qoyulub.

"TD Bank" fərdlər və bizneslər üçün çek və əmanət hesabları, ipoteka kreditləri, kredit kartları və investisiya xidmətləri təklif edir. Bankın ABŞ-da 1,100-dən çox filialı və 2,600 ATM-i var. Xüsusilə Şərq Sahilində geniş yayılmışdır.

Əvəz Həsənov