Onlayn pərakəndə nəhəngi "Amazon" qarşıdakı iki ay ərzində Kanadanın Kvebek əyalətində yerləşən bütün yeddi anbarını bağlayacağını elan edib.

Valyuta.az-ın "Yahoo Finance"a istinadən verdiyi xəbərə görə, şirkət bu qərarın müştərilərə uzunmüddətli perspektivdə "daha çox qənaət" təklif etmək məqsədinə xidmət etdiyini bəyan edib. Lakin Kanadadakı bir həmkarlar ittifaqı bu addımı bölgədə həmkarlar təşkilatlanmasının qarşısını almaq üçün atıldığını iddia edir.

Bağlanma qərarı Monreal və ətrafında təxminən 1 700 daimi tam ştatlı işçinin işdən çıxarılmasına səbəb olacaq. Bundan əlavə, anbarlarda fəaliyyət göstərən 250 müvəqqəti işçi də işini itirəcək.

"Amazon" açıqlamasında bildirib ki, bağlanma sonrası çatdırılma xidməti yerli, üçüncü tərəf şirkətləri tərəfindən həyata keçiriləcək. Şirkət 2020-ci ildən əvvəl də Kvebekdə bu modeli tətbiq edirdi.

Şirkətin sözçüsü Barbara Agrait qərarın Kvebekdəki əməliyyatların "yaxın zamanda nəzərdən keçirilməsi" nəticəsində qəbul edildiyini vurğulayıb:
"Bu qərar asan qəbul edilməyib. Təsirlənən işçilərə 14 həftəyə qədər maaş ödənişi və iş tapmaqda kömək kimi keçid yardımları təklif edirik".

Bağlanacaq obyektlər arasında bir yerinə yetirmə mərkəzi, iki çeşidləmə mərkəzi, üç çatdırılma stansiyası və böyük əşyaların, məsələn, televizor və mebelin daşınmasını təmin edən AMXL adlı obyekt mövcuddur.

Kanada hökumətinin reaksiyası

Kanadanın innovasiya, elm və sənaye naziri Fransua-Filipp Şampan "X" sosial platformasında bildirib ki, "Amazon"un Kanada üzrə əməliyyat rəhbəri ilə əlaqə saxlayaraq narazılığını ifadə edib:
"Xəbərlərdə 1 700 işçinin işdən çıxarılacağını və Kvebekdə bütün yeddi anbarın bağlanacağını öyrənəndə məyusluq və narahatlığımızı çatdırdım. Kanadada biznes bu şəkildə aparılmır".

Həmkarlar ittifaqlarının mövqeyi

May ayında "Amazon"un Laval şəhərindəki (Monreal ətrafında) bir anbarında çalışan təxminən 240 işçi həmkarlar ittifaqına qoşularaq Kanadada bu statusu qazanan ilk "Amazon" anbarı olub. Şirkət işçilərin nümayəndəlik hüququna etiraz etsə də, oktyabr ayında əyalət əmək tribunalı bu etirazı rədd edib.

Həmin təşkilatlanma prosesində iştirak edən həmkarlar ittifaqının prezidenti Karolin Sennevil qərarı "bütün Kvebek işçilərinə qarşı təhqir" adlandıraraq anti-ittifaq kampaniyası kimi dəyərləndirib:
"Bu addım Əmək Məcəlləsinin müddəalarına ziddir və biz buna qarşı qətiyyətlə mövqe tutacağıq".

Ekspertlərin qiymətləndirməsi

Qərb Universitetinin hüquq üzrə professoru Maykl Link bu vəziyyəti "Kvebekdə əmək münasibətləri sahəsində təkrarlanan bir ssenari" kimi xarakterizə edib. O, 20 il əvvəl "Walmart"ın Kvebekdə həmkarlar ittifaqı yarandıqdan sonra mağazasını bağlamasını xatırladıb.

2005-ci ildə "Walmart", Jonkyer şəhərindəki mağazasını "rentabellik problemləri" səbəbilə bağladığını bəyan etmişdi. Lakin Kanada Ali Məhkəməsi 2014-cü ildə qərara aldı ki, bu bağlanma Kvebek əmək qanunlarını pozub.

Əvəz Həsənov