Beyləqanın sabiq icra başçısı Asif Ağayevin adı ilə bağlı olan "İnşaat Servis-2” MMC-nin direktoru Aslanov Vüqar Məzahir oğlu barəsində külli miqdarda cərimə pratokolu tərtib edilib. 

Valyuta.az-ın məlumatına görə, V.Aslanov barəsində İnzibati Xətalar Məcəlləsinin 192.1-ci maddəsi ilə protokol irəli sürülüb.

İnzibati Xətalar Məcəlləsinin 192.1-ci maddəsinə görə Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsinə görə fiziki şəxslər 1000-2000 manatadək məbləğdə, vəzifəli şəxslər 3000-5000 manatadək məbləğdə, hüquqi şəxslər 20000 -25000 manatadək məbləğdə cərimə edilir.

İş Bakı Şəhəri Binəqədi Rayon Məhkəməsinin hakimi Vüsal Tağıyevin icraatındadır. 

Qeyd edək ki, İqtisadiyyat Nazirliyi yanında Dövlət Vergi Xidmətinin reyestr məlumatlarında "İnşaat Servis-2” MMC 31 avqust 2009-cu ildə qeydiyyata alındığı göstərilir. Şirkətin nizamnamə kapitalı 50 AZN-dir. Hüquqi ünvanı Bakı şəhəri Binəqədi rayonu, Cəfər Xəndan küçəsi, ev 40A, mənzil 17-də yerləşən MMC-nin qanuni təmsilçisi Aslanov Vüqar Məzahir oğludur. 

Araşdırma zamanı isə bəlli olub ki, 2020-ci ildə şirkət Beyləqan Rayon İcra Hakimiyyətindən 2 617 124.52 AZN dəyərində müxtəlif sifarişlər alıb. Şirkət Asif Ağayevin qeyri-rəsmi rəhbərliyi ilə idarə olunduğu iddia olunur. 

Xatırladaq ki, Asif Ağayev Beyləqan Rayon İcra Hakimiyyətinin sabiq başçısı, Şamaxı Rayon İcra Hakimiyyətinin sabiq başçısı olub. 06 iyun 2024-cü il tarixli Sərəncamı ilə Beyləqan Rayon İcra Hakimiyyətinin başçısı vəzifəsindən azad edilib.

Sadiq İsbəndərli