“Minimum əməkhaqqında artım olacaqmı?” sualı yavaş-yavaş “2025-ci ildə minimum əmək haqqı nə qədər olacaq?” sualı ilə əvəzlənir. Türkiyədə milyonlarla işçiyə birbaşa və dolayısı ilə təsir edən minimum əmək haqqı yeni ildə nə qədər olacaq?

Valyuta.az Türkiyə mediasına istinadən xəbər verir ki, 2025-ci il minimum əmək haqqının müəyyənləşdirilməsi üçün danışıqlara bir qədər daha vaxt verilsə də, mövcud iqtisadi şəraitlə əlaqədar olaraq yeni ildə nə qədər artımın edilə biləcəyi hələ də gündəmdədir.  Nəhayət, Beynəlxalq Valyuta Fondu (BVF) öz qiymətləndirmələrində Türkiyədə minimum əmək haqqının 14% artırılmasını təklif edib. Bu təklifə görə, cari minimum 17 002 TL-yə 2 380 TL (119 manat) əlavə olunacaq və xalis minimum əmək haqqı 19 383 TL-yə (969,1 manata) yüksələcək.

Mərkəzi Bankın inflyasiya proqnozu 38-42% aralığında olduğu halda, BVF-nin 2025-ci il üçün proqnozu 7-21% aralığındadır. Bu təxminlərin ortalaması 14% olaraq hesablanır və minimum əmək haqqının bu nisbətdə artırılmasının lazım olduğu bildirilir.

Hazırda bu qiymətləndirmələrin heç bir rəsmi qüvvəsi yoxdur. İlin sonuna doğru minimum əmək haqqının müəyyən edilməsi komissiyasının iclaslarından sonra yekun qərar veriləcək və 2025-ci il minimum əmək haqqı müəyyənləşəcək.

BVF-nin tövsiyə etdiyi 14% dərəcəsi bəzi dairələr tərəfindən kafi hesab edilmir və daha yüksək faiz artımı tələb olunur.

Əvəz Həsənov