Ali Məhkəmədə Bakıda biznesmenə qarşı külli miqdarda dələduzluq etməkdə təqsirləndirilən Orucəli Abbasovun barəsindəki qərardan verilən kassasiya şikayəti üzrə məhkəmə iclası yekunlaşıb. 

Hakim İlqar Qılıcovun sədrliyi ilə keçirilən prosesdə qərar elan olunub. 

Qərara əsasən, aşağı instansiya məhkəməsinin çıxardığı qərar qismən ləğv edilib, iş yenidən baxılması üçün apellyasiya instansiyası məhkəməsinə göndərilib. İttihama görə, 1962-ci il təvəllüdlü Orucəli Abbasov Dərnəgüldəki metal bazarı adlanan iş adamı Əbdülhəsən Səfərovdan 1 milyon 44 min manatlıq metal borularını nisyə götürsə də, həmin pulları ödəməyib. Onun barəsində Cinayət Məcəlləsinin 178.4-cü (dələduzluq-xüsusilə külli miqdarda ziyan vurmaqla) maddəsi ilə ittiham irəli sürülüb. 

Məhkəmədə iş adamı Əbdülhəsən Səfərov bildirib ki, Orucəli Abbasov ondan aldığı külli miqdarda boruların pulunu müxtəlif sahələrə xərcləyib. O, həmçinin qeyd edib ki, təqsirləndirilən şəxs şahidlərə təzyiqlər göstərib, onların ifadələrini dəyişməsi üçün təkliflər edib. Orucəli Abbasov isə deyib ki, satdığı malların pulunun böyük hissəsini verib. Bakı Ağır Cinayətlər Məhkəməsinin hökmü ilə Orucəli Abbasov 11 il müddətinə azadlıqdan məhrumetmə cəzasına məhkum edilib.

Pravda.az