Ermənistanın iqtisadiyyat naziri Gevorq Papoyan İranın Ermənistandakı səfirinin müavini Mehdi Sobhani ilə birlikdə Armavir vilayətinin Karakert kəndində İran sərmayələri ilə yaradılan metallurgiya zavoduna baş çəkib.

Yeniavaz.com Ermənistan mətbuatına istinadən xəbər verir ki, zavodun tikintisinə 2021-ci ildə başlanılıb. Birinci mərhələdə 5 milyon dollar sərmayə qoyulub ki, bunun sayəsində hazırda gündəlik istehsal həcmi 60 ton metal məmulatına çatır.

İkinci mərhələdə 7 milyon dollardan çox investisiya nəzərdə tutulub, bundan sonra məftil istehsalına başlanılacaq. Zavodun gücü ildə 200 min ton metal profil və külçədir.

Bildirilib ki, zavodda 170 işçi çalışır ki, onlardan 40-a yaxını İrandan, qalanları Ermənistandandır. Tam işə salındıqdan sonra müəssisədə iş yerlərinin sayı 250-yə çatacaq.