Dövlət Gömrük Komitəsi (DGK) “İmprotex Group” şirkətinə daxil olan “İmprotex Trucks and Buses” MMC barəsində inzibati protokol tərtib edib. 

Valyuta.az xəbər verir ki, şirkətə qarşı İnzibati Xətalar Məcəlləsinin 493-cü (Gömrük bəyannaməsinin və onunla birgə təqdim edilməli olan sənədlərin Azərbaycan Respublikasının Gömrük Məcəlləsində müəyyən edilmiş müddətdə müvafiq icra hakimiyyəti orqanına təqdim edilməməsi) ilə ittiham irəli sürülüb.

Bu maddəyə görə fiziki şəxslər əlli manat məbləğində, vəzifəli şəxslər yüz əlli manat məbləğində, hüquqi şəxslər üç yüz manat məbləğində cərimə edilir. İşə Nəsimi Rayon Məhkəməsində baxılacaq. 

“İmprotex Group” şirkəti keçmiş nazir Füzuli Ələkbərova məxsusdur. 

Füzuli Ələkbərov 2006-2013-cü illərdə əmək və əhalinin sosial müdafiəsi naziri vəzifəsində işləyib. O, 2013-cü ildə baş verən İsmayıllı hadisələrindən sonra işdən çıxarılıb. Həmin vaxt Füzuli Ələkbərovun oğlu Vüqar Ələkbərovun ismayıllıları təhqir etməsinə görə rayonda etiraz aksiyaları keçirilib. Onu da qeyd edək ki, İsmayıllı hadisələri zamanı rayonun icra başçısı Füzuli Ələkbərovun qardaşı Nizami Ələkbərov olub.

Hüseyn