İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən 15 mart - Ümumdünya İstehlakçı Hüquqlarının Müdafiəsi Gününə həsr olunmuş "Yaşıl iqtisadiyyata keçidin istehlakçı davranışlarına və istehlak bazarına təsiri: çağırışlar və perspektivləri" mövzusunda Forum keçirilib. Tədbirdə dövlət qurumlarının nümayəndələri, biznes assosiasiyalarının təmsilçiləri, sahibkarlar və digər maraqlı tərəflər iştirak ediblər.

Tədbirdə çıxış edən iqtisadiyyat nazirinin müavini Sahib Məmmədov bildirib ki, “yaşıl iqtisadiyyat”ın inkişafı məqsədilə institusional islahatlar həyata keçirilir, texnologiyaların inkişafı ilə bağlı fəaliyyət genişləndirilir. Eyni zamanda, ölkədə ətraf mühitin sağlamlaşdırılması, yaşıllıqların bərpası və artırılması, su ehtiyatları və dayanıqlı enerji mənbələrindən səmərəli istifadənin təmin edilməsi istiqamətində işlər aparılır. Azad edilmiş ərazilərdə həyata keçirilən genişmiqyaslı bərpa və yenidənqurma prosesində ətraf mühitin qorunmasının prioritet olduğunu xatırladan nazir müavini qeyd edib ki, həmin ərazilərdə “ağıllı şəhər”, “ağıllı kənd” kimi innovativ yanaşmalar tətbiq edilir, ekosistem bərpa olunur.