İndoneziyada yerləşən Batik Hava Yollarının son uçuşlarından birində iki pilotun təyyarəni idarə edərkən yatdığı iddia edilib. 

Valyuta.az xəbər verir ki, İndoneziya Nəqliyyat Nazirliyinin Mülki Aviasiya Baş direktoru Kristi Endah Murni hadisə ilə bağlı araşdırmaya başlanıldığını açıqlayıb. Milli Nəqliyyat Təhlükəsizliyi Komitəsinin (KNKT) dərc etdiyi hesabatda, yanvarın 25-də Kendaridən paytaxt Cakartaya gedən təyyarənin hər iki pilotunun uçuş zamanı 28 dəqiqə yatdığı nəticədə təyyarənin marşrutdan çıxdığı bildirilib. Hadisə nəticəsində heç kim xəsarət almayıb.

KNKT-nin xəbərində bildirilib ki, ikinci pilot uçuşdan əvvəl kapitana kifayət qədər dincələ bilmədiyi barədə məlumat verib. İkinci pilotun hadisədən əvvəl təxminən yarım saat yatdığı, təyyarənin kruiz hündürlüyünə çatdıqdan sonra kapitanın təyyarənin idarə edilməsini ikinci pilotun ixtiyarına verdiyi qeyd edilib. Havaya qalxdıqdan təxminən 90 dəqiqə sonra idarəetməni ələ keçirən ikinci pilot isə istəmədən yuxuya gedib. Bildirilib ki, pilot kabinəsi ilə son əlaqədən 12 dəqiqə sonra Cakartadakı idarəetmə mərkəzi pilotlarla danışmağa çalışsa da, təyyarədən cavab gəlməyib. Sonuncu əlaqədən 28 dəqiqə sonra kapitan ayılaraq təyyarənin düzgün marşrutda olmadığını anlayıb və dərhal idarəetmə mərkəzi ilə əlaqə saxlayıb. Kapitan pilot ilk çıxışında idarəetmə mərkəzinə onlarda radio rabitə problemi olduğunu, lakin onun həll edildiyini bildirib. KNKT-nin xəbərində ikinci pilotun bir aylıq əkiz körpələrinin olduğu və onlara qulluq etmək üçün gecələr dəfələrlə oynamaq məcburiyyətində qaldığı yazılıb.

Xəbərdə adları açıqlanmasa da, kapitan pilotun 32, digərinin isə 28 yaşında olduğu bildirilib.

Elmir