Antoninin  “Mançester Yunayted”dəki karyerasının ən zəif göstəricisi şənbə günü “Fulhem”ə qarşı oyunda göründü. 

Valyuta.az xəbər verir ki, nəhayət klub Antonini satmaq qərarına gəlib. Baş məşqçinin etimadını doğrultmayan braziliyalının 2022-ci ilin yay fasiləsində “Ayaks”dan transfer edilməsi üçün 95 milyon avro xərcləməsi birmənalı qarşılanmamışdı. Belə demək mümkünsə, “Ayaks” həmin vaxt “Mançester Yunayted”in çarəsizliyindən istifadə edərək ingilislərə sürpriz qiymət “oxudu”. Niderland klubundakı dəyəri 35 milyon avro məbləğində qiymətləndirilən Antoni hazırda Ten haqın ən böyük transfer səhvi kimi göstərilir.

Transfer məbləğinə görə tənqid olunmasına baxmayaraq, Antoni İngiltərədəki ilk mövsümündə ümid vermişdi. O, Premyer Liqada “Arsenal”,  “Mançester Siti” və  “Everton”a qarşı ilk üç oyununda qol vuraraq parlaq bir başlanğıc etmişdi. Lakin mövsümün qalan hissəsində cəmi bir qol vura bildi. O, "Barselona" və  “Betis”ə qarşı da mühüm qollar vurdu. Lakin ümumilikdə meydana çıxdığı 47 oyunda vurduğu 10 qol və beş məhsuldar ötürmə onun transfer haqqını nəzərə alsaq, çox aşağı idi. Halbuki futbolçu “Ayaks”da 82 oyunda 24 qola və 22 məhsuldar ötürməyə imza atmışdı. 

Cim Ratkliff bu yaxınlarda klubu satın aldıqdan sonra “Mançester Yunayted” braziliyalını göndərməyi düşünür. Bununla belə, klub, Antony ilə müqavilə bağlamaq üçün ödədikləri 95 milyon avroluq astronomik məbləğdə böyük itki ilə üzləşib. İndiki vəziyyətdə klubun bu boşluğu doldurmaqda çətinlik çəkəcəyi gözlənilir. 

Hazırda Antoninin bazar dəyəri “Mançester Yunayted”də oynadığı müddətdə 35 milyon avroya düşüb. Hansı ki, bu, onun “Ayaks”dakı bazar dəyəri idi. Braziliyalı həm də İngiltərə klubunda potensial alıcıları fikirlərindən daşındıra biləcək və bu yay onun çıxışını çətinləşdirəcək dərəcədə böyük maaş alır. O, hazırda "Mançester Yunayted"dəki gələcəyi üçün mübarizə aparır və mövsümün sonuna qədər xeyli inkişaf edə bilməsə, son on ildə klubun ən pis transferlərindən biri kimi yadda qalacaq.

Elmir