Ötən illə müqayisədə bu il Araz su anbarına su daha az yığılıb. Füzuli, Beyləqan, Ağcabədi, İmişli, Saatlı, Sabirabad, Biləsuvar və Cəlilabadda suvarma suyunun təminatı ilə bağlı çətinliklər yaşanıb. 

Valyuta.az-ın Xezerxeber.az-a istinadən verdiyi məlumata görə, bunu "Meliorasiya və Su Təsərrüfatı" ASC-nin Suvarma sistemlərinin istismarı şöbəsinin əməkdaşı Qulu Kərimov deyib.

O bildirib ki, sözügedən bölgələrdə su ilə bağlı yaşanan problem Mingəçevir su anbarının köməkliyi ilə aradan qaldırılıb:

“Kür çayının aşağı zonasında yerləşən Neftçala və Salyan rayonlarında da su çatışmazlığı var. Problemi aradan qaldırmaq üçün Yuxarı Şirvan və Yuxarı Qarabağ kanalları, o cümlədən Kür çayı üzərində yerləşən nasos stansiyalarına limitlər qoyulub. Hazırkı vəziyyətdə yeganə çıxış yolu mövcud su mənbələrindən və su ehtiyatlarından səmərəli istifadə etməkdir”.

Qurum rəsmisinin sözlərinə görə, su istifadəçiləri arasında suyun ədalətli bölüşdürülməsi üçün ötən ildən etibarən 54 region üzrə suvarma qrafikləri tərtib edilib: 

“Bu qrafiklər Kənd Təsərrüfatı Nazirliyinin rəsmi saytında yerləşdirilib. Su istifadəçiləri sayta daxil olaraq həmin qrafikə əsasən su növbələri barədə məlumat əldə edə bilərlər”.