“Qəbul zamanı testə düşən suallarla bağlı bəzi məqamlar bizi narahat edir”.

Bu fikirləri təhsil naziri Emin Əmrullayev Milli Məclisdə “Ali təhsil haqqında” qanun layihəsinin müzakirələri zamanı deyib.

Valyuta.az-ın məlumatına görə, təhsil eksperti Kamran Əsədov Modern.az-a deyib ki, son illər qəbul imtahanlarında istifadə edilən test tapşırıqları orta ümumtəhsil məktəblərinin proqramlarında şagirdlərə verilən biliklərin məzmunundan daha fərqli formatda təqdim edilir:

“Bunun səbəbi isə orta məktəblərdə çalışmayan kadrların test tapşırıqlarını hazırlamasıdır.

Digər ən vacib məqam isə test tapşırılarındakı distraktorların şagirdlərin yaş xüsusiyyətlərindəki psixologiyasına uyğun olmamasıdır. Yəni test tapşırıqları hazırlanan zaman şagirdlərin daha çox diqqət və yaddaş bacarıqları yoxlanılırsa, orta ümumtəhsil məktəblərinin tədris proqramında tamamilə fərqli - minimum biliklər, eyni zamanda cəmiyyətdə onun üzləşəcəyi problemli situasiyalardan çıxış bacarıqları yoxlanılır. Bu səbəbdən hesab edirəm ki, test tapşırılarının məzmunu və strukturu ilə bağlı müəyyən sadələşdirmələr aparmaq lazımdır. Son illər imtahanda istifadə edilən test tapşırıqlarının modelləri qəlizləşib. Şagirdlərin bilikləri deyil, yaddaşları yoxlanılır”.

Ekspert təhsil nazirinin məsələyə doğru yanaşdığını qeyd edib:

“Emin Əmrullayev bu fikri səsləndirməkdə çox haqlıdır. Biz imtahan zamanı  düzgün yoxlama və ölçmə alətlərindən istifadə etmirik. Hesab edirəm ki, qəbul imtahanlarında sualların modellərində müəyyən qədər sadələşdirmə aparmalıyıq ki, hər bir abituriyent üçün ali məktəblərə qəbul olmaq rahat olsun”.