Bu ilin may ayında Azərbaycanın bank sektorunun iştirakçıları 78,5 mln. manat məbləğində xalis mənfəət əldə ediblər.

Bu barədə Valyuta.az-a Mərkəzi Bankdan bildirilib. 

Bu göstərici aprel ayı ilə müqayisədə 71% çoxdur. Bankların əməliyyat mənfəətinin əsasını xalis faiz gəlirləri təşkil edib. Belə ki, mayda bankların xalis faiz gəlirləri cəmi 0,7% artaraq 125,4 mln. manat olub (apreldə bu göstərici ümumiyyətlə dəyişməmişdi – red.), xalis qeyri-faiz zərəri isə 2,8 dəfə azalaraq 15,8 mln. manat təşkil edib. 

Beləliklə, may ayında bank sektorunun əməliyyat mənfəəti qeyri-faiz zərərinin azalması hesabına 35,6% artaraq 109,6 mln. manata bərabər olub.

Qeyd edək ki, hesabat ayında bank sektorunun mənfəətdən vergiləri 36,3% azalaraq 7,2 mln. manat təşkil edib, aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırmaları isə 23,9 mln. manat artırılıb və 87,5 mln. manata çatdırılıb.