“Direktorların işə qəbul imtahanlarının iştirakçıları ilə bağlı əvvəllər ciddi məhdudiyyətlər olsa da, sonrakı illərdə bu məhdudiyyətlər aradan qaldırılıb”.

Valyuta.az xəbər verir ki, bunu Təhsil Nazirliyinin İnsan resursları şöbəsinin müdiri Eşqi Bağırov bildirib.

Onun sözlərinə görə, əvvəllər müsabiqədə yalnız yerli idarəetmə orqanlarının namizdələri iştirak edə bilirdi, daha sonra bu məhdudiyyət aradan qaldırılıb.

E. Bağırov bildirib ki, son illərdə daha çox namizədin iştirakı müşahidə edilir:

“Vakant yerlərin sayı illər üzrə 600, bəzən 700-ə çatıb ki, bu da təhsilin keyfiyyətinə təsirsiz ötüşməyib. Ötən il sonuncu dəfə elan edilən müsabiqədə rekord sayda iştirakçı sayı olub. Bu il 2000-dən çox şəxs test imtahanında iştirak edib, bu mərhələdə 1500-dən çox namizəd keçid balını toplayaraq növbəti mərhələyə dəvət olunacaqlar. Müsahibə mərhələsində bu il keçid balına müəyyən olunarkən namizədlərin seçdikləri vakant yerlərdə təhsil alanların sayı təsir edib. Növbəti həftədən başlayacaq müsahibə mərhələsində ən yüksək bal toplayan namizədlər dəvət olunacaq. Nəticələr günün sonunda namizədlərin şəxsi səhifələrində yerləşəcək. Yerləşdirmə mərhələsi isə bütün müsahibələr başa çatandan sonra həyata keçiriləcək”.

Onun sözlərinə görə, ilkin mərhələdə dəvət olunan namizədlər 1000 nəfərdən çox şagirdi olan məktəblərə iddia edəcəklər:

“İkinci mərhələdə 500-1000, üçüncü mərhələdə 100-500, sonuncu mərhələdə isə 100-ə qədər şagird sayı olan məktəblərə iddia edəcəklər”.

E. Bağırov deyib ki, test imtahanı mərhələsində daha çox nəzəri biliklər yoxlanılıb:

“Növbti mərhələlərdə namizədlərin daha çox ümumi dünya görüşü, idarəçilik səriştəsi, peşəkar kompitensiyalarını yoxlayacağıq. Yay aylarında müsahibələrin böyük hissəsini bitirib, vakant yerlərin bir hissəsinə təyinatları həyata keçirmək istəyirik”.

TN rəsmisi onu da əlavə edib ki, idarətemə üzrə təhsili olan şəxslər pedaqoji təhsili olmasa belə bu vəzifəyə iddia edə biləcək.