Bu ilin I rübündə Rusiyadakı fiziki şəxslər tərəfindən Azərbaycana pul köçürmələri $119,947 milyon təşkil edib. 

Mərkəzi Bankdan bu barədə Valyuta.az-a bildirilib ki, ötən ilin yanvar-mart aylarında fiziki şəxslər Rusiyadan Azərbaycana $95,228 milyon vəsait köçürüblər. Beləliklə, 2021-ci ilin I rübündə Rusiyadan Azərbaycana fiziki şəxslərin pul köçürmələri 26% artıb.

Cari ilin I rübündə Rusiya Azərbaycana pul köçürmələri həyata keçirən ölkələr arasında birinci yerdə qərarlaşıb, xüsusi çəki 52,9% (2020-ci ilin yanvar-mart aylarında 50,7%) təşkil edib.

2021-ci ilin I rübündə Azərbaycana pul köçürmələrinin həcmi $226,641 milyon (artım 20,6%) təşkil edib.

Fiziki şəxslər tərəfindən Azərbaycana pul köçürmələrinin həyata keçirildiyi ölkələrin beşliyinə Türkiyə ($20,003 milyon, artım 11%), ABŞ ($11,867 milyon, artım 17,6%), Böyük Britaniya ($8,076 milyon, artım 48%) və Qazaxıstan ($8,004 milyon, azalma 1,5%) daxildir.

Hesabat dövründə Azərbaycandan xaricə pul köçürmələrinin həcmi 0,3% - $121,952 milyona qədər azalıb.

Azərbaycandakı fiziki şəxslər tərəfindən pul köçürmələrinin həyata keçirildiyi ölkələr arasında ilk yeri Türkiyə tutub ($33,519 milyon, artım 27%). 2021-ci ilin yanvar-mart aylarında Azərbaycandan həyata keçirilən bütün pul köçürmələrinin 27,5%-i (2020-ci ilin I rübündə 21,6%-i) bu ölkənin payına düşüb.

Hesabat dövründə Azərbaycandan Rusiyaya pul köçürmələrinin həcmi $25,948 milyon təşkil edib ki, bu da bir il əvvəllə müqayisədə 11,5% azdır.

Cari ilin I rübündə Azərbaycandan fiziki şəxslərin pul köçürmələri həyata keçirdiyi ölkələrin ilk beşliyinə Gürcüstan ($16,571 milyon, artım 2,1 dəfə), ABŞ ($9,407 milyon, azalma 9,4%) və Ukrayna da ($5,428 milyon, azalma 9,9%) daxildir.