Mədəniyyət və Turizm Nazirliyi Türkiyənin 2024-cü ilin ilk 4 ayında 12 milyon 678 min 959 ziyarətçi qəbul etdiyini açıqlayıb.

Valyuta.az-ın verdiyi xəbərə görə, Türkiyə Mədəniyyət və Turizm Nazirliyi 2024-cü ilin yanvar-aprel ayları üzrə turizm məlumatlarını açıqlayıb. Ziyarətçilərin 10 milyon 654 min 94-ü əcnəbi olub. Türkiyə Statistika Təşkilatının son 3 ayda xaricdə yaşayan vətəndaşların statistikasına görə, 2 milyon 24 min 865 Türkiyə vətəndaşı ziyarət edib. Ötən ilin eyni dövrü ilə müqayisədə xarici ziyarətçilərin sayında 11,75 faiz artım olub.

Turistlərin ən çoxu Almaniyadandır

Almaniya 2024-cü ilin ilk 4 ayında Türkiyəyə ən çox ziyarətçi göndərən ölkələr arasında 16,2 faiz artım ilə 1 milyon 122 min 930 ziyarətçi ilə birinci olub. Rusiya Federasiyası 1 milyon 78 min 294 ziyarətçi ilə 2-ci, İran isə 51,78 faiz artım ilə 946 min 437 ziyarətçi ilə 3-cü yerdə qərarlaşıb. Bu ölkələri Bolqarıstan və İngiltərə izləyib. 

Aprel ayında Türkiyəyə gələn xarici ziyarətçilərin sayı keçən ilin eyni ayına görə 8,71 faiz artaraq 3 milyon 611 min 244 nəfərə çatıb. Aprel ayında Türkiyəyə ən çox ziyarətçi göndərən ölkələr arasında Almaniya 434 min 863 nəfərlə birinci, Rusiya Federasiyası 4,07 faiz artımla, 396 min 155 nəfərlə ikinci, Böyük Britaniya isə 18,01 faiz artımla, 330 min 112 adamla 3-cü olub.

Əvəz Həsənov