Dövlət Turizm Agentliyinin sədr müavini Azadə Hüseynova bildirib ki, Azərbaycanda turizmlə bağlı yeni investisiya təşviq mexanizmləri hazırlanır. Yeni əlavələrin də üzərində işlənilir. Maraqlıdır, turizmə investisiya cəlb etmək üçün hansı mexanizmlər hazırlana bilər? Turizim sahəsinə investisiya cəlb etmək üçün hansısa güzəştlər oluna bilərmi?

Turizm eksperti Rəhman Quliyev Valyuta.az-a bildirdi ki, regionda fəaliyyət göstərən turizm komplekslərinin müəyyən güzəştlərə ehtiyacı var:

“Regionda fəaliyyət göstərən hotel və turizm kompleksləri, eyni zamanda termal xarakterli sanatoriyalar fəsilə və sezona görə işləyib qazandıqları pulu qeyri-sezon vaxtlarında, gəlir gəlmədiyi bir vaxtda işçilərin əmək haqqını, hotelin digər xərclərini ödəmək məcburiyyətindədirlər. Bu kimi hal turizm firmalarında da nəzərə çarpacaq dərəcədə hiss olunur. Turizm firmalarının və yalnız turistlə işləyən obyektlərin qeyri-sezon vaxtlarında dəstəyə ehtiyacı var. Xüsusi proqram çərçivəsində uzunmüddətli faizsiz kreditlər ayrılması turizmin inkişafdan qalmasının qarşısını alacaq”.

Ekspert deyir ki, digər tərəfdən sahibkarlara xüsusən də Şərqi Zəngəzur və Qarabağ iqtisadi rayonlarında turizm komplekslərinin tikintisinə, fəaliyyətinə münbit şərait yaradılmalıdır: “Həm işğaldan azad olan rayonlarımıza qayıdan insanlar üçün yeni iş yeri açılmalı, eyni zamanda bölgəyə turist axını üçün imkanlar yaradılmalıdır. Bu gün turizm senayesinə qoyulan investisiya qısa zamanda çoxşaxəli imkanlar yaradacaq və ölkəmizə mənfəət gətirəcək”.

Əvəz Həsənov