Gürcüstanın “Geosky” aviaşirkətinin törəməsi olan  aşağıbüdcəli (ucuz) “Georgian Wings” şirkəti Tbilisidən Bakıya reyslərin sayını artırır.

Valyuta.az-ın məlumatına görə, “Georgian Wings” Tbilisi-Bakı-Tbilisi üzrə həftədə 5 reys həyata keçirəcək.

Bu marşrut üzrə hər həftənin bazar ertəsi, çərşənbə, cümə, şənbə və bazar günləri 72 sərnişin üçün nəzərdə tutulmuş Fransa-İtaliya istehsalı olan ATR72-500 təyyarəsi ilə sərnişinlərə xidmət göstəriləcək.

Aviaşirkətin nümayəndəsinin sözlərinə görə, “Georgian Wings” artıq 1 aydır ki, Tbilisi Beynəlxalq Hava Limanından Bakı Beynəlxalq Hava Limanı istiqamətində fəaliyyət göstərir:

"İlkin olaraq həftədə 3 tezliklə fəaliyyətə başladıq. Qeyd olunan marşruta tələbdə artım müşahidə olundu ki, bu da o deməkdir ki, aviaşirkətin gözləntiləri özünü doğrultdu. Uçuş cədvəli aviaşirkətimiz tərəfindən həyata keçirilən Tbilisi-Batumi-Tbilisi daxili reysinin uçuş cədvəlinə uyğunlaşdırılıb ki, bu da sərnişinə Tbilisi hava limanından tranzit və komfortlu səyahət kimi əlavə imkan yaradır”.

Aviabiletləri Georgian Wings-in rəsmi saytından, həmçinin kassalardan və turizm agentliklərindən əldə etmək olar.

Xatırladırıq ki, “Georgian Wings” ilk beynəlxalq müntəzəm uçuşunu 2023-cü il sentyabrın 5-də edib və o vaxtdan etibarən Tbilisi Şota Rustaveli Beynəlxalq Hava Limanından Bakı Heydər Əliyev Beynəlxalq Hava Limanına müntəzəm uçuşlar həyata keçirir.

© Marja