“Bu bir az strateji məsələdir. İndiki halda həmin ərazilərə səfərlərin təşkil edilməsini doğru hesab etmirəm”

Bu sözləri Valyuta.az-a iqtisadçı Rəşad Həsənov “işğaldan azad edilən ərazilərə turist cəlb etmək üçün dövlət hansı işləri görməlidr” sualına cavab verərkən deyib. 

İqtisadçı bildirib ki, indiki halda işğaldan azad edilmiş ərazilərə turizm məqsədli səfərlər, müəyyən məhdudiyyətlər və nəzarət altında yalnız yerli vətəndaşlar üçün nəzərdə tutulub:

“Həmin ərazilər minalardan və eyni zamanda silah-sursat qalıqlarından təmizlənməlidir. Xüsusi ilə də Xankəndi və ətrafında Ermənistana məxsus olan qeyri-qanuni hərbi silahlı birləşmələr var. Zaman-zaman orada müxtəlif irili-xırdalı qarşıdurmalar yaranır. Bu şərtlər daxilində həmin bölgəyə xarici vətəndaşların turist səfərlərinin təşkil edilməsi məsuliyyətini mən düşünürəm ki, hökumət üzərinə götürməməlidir. Bu  çox böyük riskdir. Onun iqtisadi faydalarından çox, siyasi zərərləri ola bilər və belə bir məsuliyyəti üzərinə götürməməyi, indiki şərtlər daxilində belə bir məhdudlaşdırmanı tətbiq etməyi də doğru hesab edirəm”. 

Rəşad Həsənov əlavə edib ki, gələcəkdə həmin bölgə üçün turizm çox vacib bir inkişaf istiqaməti olacaq:

“Orada bir neçə istiqamət var: mədən sənayesi, kənd təsərrüfatı və turizm. Yəni bu sahələr həmin bölgənin iqtisadiyyatında əhəmiyyətli lokomotiv rolunu oynayacaqlar. Amma bununla belə, indiki şərtlər daxilində müvafiq riskləri xaricilərin həmin ərazilərə səfərlərinin təşkil edilməsini doğru hesab etmirəm”.

Davud