“Azərbaycanda turizm sektorunun ən ağrılı məsələsi, iqtisadiyyatın digər sektorları kimi monopoliyanın olması, inhisarçılıq problemidir. Bu sahə kifayət qədər ölkənin oliqarxları tərəfindən inhisara götürülüb. Məhz elə buna görə də istirahət mərkəzlərinin sayı artsa da, qiymət aşağı düşmür”. 

Bu fikirləri Valyuta.az-a Liberal İqtisadçılar Mərkəzinin sədri Akif Nəsirli Azərbaycanda turizm sahəsində olan problemlər haqqında danışarkən deyib.

İqtisadçı bildrib ki, turizmlə məşğul olan sahibkarlar ayrı-ayrı adamlar olsa da, onların tabeçiliyi bir neçə nəfərin şəxsində cəmləşir:

“Ona görə də istirahət mərkəzləri nə qədər çox olsa da, hamısında qiymət təxminən eyni formada mərkəzləşir. Yəni qiymət rəqabətə məruz qalmır. Qqiymət rəqabətə məruz qalmadığına görə də keyfiyyət ildən ilə aşağı düşür. Qiymət isə yavaş-yavaş bahalaşır. Yəni Azərbaycanda digər sahələrdə olan ənənəvi problemlər turizm sahəsinə də şamildir. Dəfələrlə demişik ki, istənilən bazar seqmentində rəqabət olmasa vaxtaşırı qiymətlər bahalaşacaq. Keyfiyyət isə ildən ilə aşağı düşəcək”. 

İqtisadçı əlavə edib ki, qabiliyyəti və imkanı olan hər bir şəxs turizmlə məşğul ola bilsə, bu sahədə problemlər aradan qalxar:

"Məsələn, elə turizm bölgələrimiz var ki, əhali ev turizmindən, yəni evini turistlərə icarəyə verməklə müəyyən vəsait qazanır. Həmin o ev turizm məkanı kimi sənədləşdirilmək olar. Ancaq bizdə vergi işçiləri müəyyən reyd aparır, qeyri-qanuni şəkildə turistləri evində saxlayan vətəndaşları cərimələyir və bununla da işlərini bitmiş hesab edirlər. Halbuki ona elə bir elə şərait yaratmaq olar ki, turizmlə məşğul olan həmin insanlar sənədləşmə aparsınlar, öz fəaliyyətlərini leqallaşdırsınlar, müəyyən məbləğdə vergi ödəsinlər və heç kimə də cərimə ödəməli olmasınlar. Turizmlə məşğul olmaq istəyən sahibkarların hüquqi prosedurlarını çətinləşdiriblər. Hüquqi prosedurdan əlavə onların real işlərində çox ciddi əngəllər yaradıblar və ona görə də ölkədə turizm sektoru nə genişlənmir, nə inkişaf etmir. Bununla yanaşı, deməli, qiymətlər baha, xidmət isə keyfiyyətsiz olaraq qalır”.

Davud