Bir vaxtlar dünyanın ən böyük mobil telefon istehsalçısı olan "Nokia", texnologiya və telekommunikasiya sahələri arasında körpü qurmaq məqsədilə yeni bir satınalma həyata keçirib: o, keçmiş adı "RapidAPI" olan və "API" bazarı təminatçısı kimi tanınan "Rapid" şirkətini satın alıb. 

Valyuta.az xəbər verir ki, bu addım "Nokia"nın 5G operatorları üçün hazırladığı və şəbəkələrin daha çox proqram tərtibatçısına açılmasını təmin edən platformaya dəstək məqsədilə atılıb.

Razılaşmanın şərtləri ictimaiyyətə açıqlanmasa da, "Rapid" bir vaxtlar 1 milyard dollar dəyərində qiymətləndirilib və 40 minə yaxın "API"dən istifadə edən təxminən 4 milyon istifadəçisi var idi. Hazırda "Rapid"in aktiv istifadəçilərinin sayı “minlərlə” olaraq bildirilib. "Nokia"nın açıq səhmdar şirkət olması səbəbilə bu məlumatların gələcək hesabatlarda təqdim ediləcəyi ehtimal edilir.

Texnologiya sektoru son illərdə əhəmiyyətli dərəcədə dəyişib və xüsusilə də daha gec mərhələdə olan startaplar üçün yüksək maliyyələşmə gözləntilərinə çatmaq çətinləşib. "Rapid"in 1 milyard dollarlıq dəyəri 2022-ci ildə əldə edilən maliyyələşmədən sonra formalaşıb və böyük ehtimalla "API"lər üzərindən qurulmuş biznes modeli də bu dəyişikliklərlə təkamül edib.

Rəhim

"Rapid"in qurucusu İddo Cino (şirkəti 2015-ci ildə cəmi 17 yaşında qurub), 2023-cü ilin aprelində baş direktor vəzifəsindən ayrılıb. Bu hadisədən sonra şirkət işçi sayını 82% azaltmaq üçün ən azı iki əsas ixtisar mərhələsindən keçib ki, bu da mətbuatda “Rapid-in sürətli enişi” başlıqlarına səbəb olub.

San-Fransiskoda yerləşən "Rapid" "Andreessen Horowitz", "Microsoft" və "SoftBank" kimi böyük investorların da daxil olduğu qrupdan təxminən 273 milyon dollar sərmayə toplayıb.

Hazırda "Rapid"də neçə nəfərin çalışdığı və "Nokia"ya keçid edəcək işçilərin sayı məlum deyil. "Nokia" açıqlamasında daha çox məhsula diqqət yetirərək, “minlərlə aktiv inkişaf etdirici tərəfindən istifadə olunan dünyanın ən böyük "API" mərkəzi və yüksək ixtisaslı tədqiqat və inkişaf bölməsinin də daxil olduğu texnoloji aktivlər” əldə etdiyini vurğulayıb.

Bu satınalma "Nokia" üçün maraqlı və bir qədər də ironik bir dönüşdür. Finlandiya şirkəti mobil dünyada bir pioner kimi tanınıb.

1990-cı illərdə "Nokia" qlobal mobil şəbəkələrin qurulması sahəsində qabaqcıl idi və mobil telefon istehsalında dünya lideri olmuşdu. Ancaq 2000-ci illərdə "Apple" və "Google" (həmçinin "Google"nin "Android" əməliyyat sistemi üzərində qurulan "Samsung" və digər şirkətlər) ilə smartfon sahəsində geri qalıb. Bəzi analitiklər "Nokia"nın uğursuzluğunu tətbiqlər və üçüncü tərəf ekosistemləri üçün genişlənə bilən bir mühit qura bilməməsi ilə əlaqələndirirlər. Bu səbəbdən şirkətin indi özünü texnologiya sahəsində körpü rolunda görməsi diqqət çəkir.

Xüsusilə, "Nokia" 5G şəbəkələrinin tətbiqi ilə bu sahədə özünə yeni bir imkan görür. Şirkət bildirir ki, operatorlar bu şəbəkələrdə daha çox üçüncü tərəfin tətbiq və digər xidmətlər qurmasını istəyirlər və bu məqsədlə “şəbəkə kod kimi” adlı yeni bir platforma təqdim ediblər. "Rapid"in API strukturu da bu təşəbbüsün bir hissəsi olacaq. "Nokia" bu platformaya daxil olan operator və xidmət təminatçıları arasında BT, "DISH", "Google Cloud", "Infobip", "Orange", "Telefonica", "Telecom Argentina" və daha 20 şirkətin olduğunu qeyd edib.