"Qualcomm" dördüncü rüb üzrə maliyyə nəticələrini açıqlayıb. 

Valyuta.az xəbər verir ki, 2024-cü maliyyə ili üzrə hesabatda "Qualcomm" əhəmiyyətli artım nümayiş etdirib. Hər səhmə düşən gəlirdə artım müşahidə olunub və əməliyyat gəlirlərində də rekord səviyyədə pul axını qeydə alınıb. 

"Qualcomm", "QCT"* avtomobil seqmentində ardıcıl olaraq beşinci rüb rekord gəlirlər əldə etdiyini vurğulayıb və yeni məhsulların təqdimatı ilə yanaşı, strateji təşəbbüsləri barədə də optimist olduğunu bildirib.

2024-cü maliyyə ili üzrə əsas maliyyə göstəricilərinə görə, ümumi gəlirlər 9% artaraq 39,0 milyard dollara çatıb və "GAAP"** əsaslı hər səhmə gəlir 40% yüksəlib. Xüsusilə "QCT" seqmentində avtomobil gəlirləri 68% artaraq əhəmiyyətli irəliləyiş göstərib. "QTL"*** lisenziya seqmenti də maliyyə ili üzrə gəlirlərdə 5%-lik artım əldə edib. Bundan əlavə, "Qualcomm" 15 milyard dollarlıq yeni səhm geri alım proqramını elan edib ki, bu da şirkətin maliyyə mövqeyinə olan inamını əks etdirir.

"Qualcomm"un diversifikasiya və texnoloji liderliyə əsaslanan strateji yanaşması şirkətin gələcək artım üçün möhkəm mövqedə olmasını təmin edib. Şirkət avtomobil və sənaye "IoT"**** daxil olmaqla müxtəlif sahələrdə yeni inkişaf təşəbbüsləri ilə bağlı yenilikləri gözləyir və "Snapdragon" platformalarını istifadə edərək irəliləyişlərə nail olmağı planlaşdırır.

Həmçinin "Qualcomm" rəhbərliyi gəlirlərdə və gəlirlilikdə davamlı artım gözlədiyini və 2025-ci maliyyə ilinin birinci rübündə maliyyə dayanıqlığının və əməliyyat səmərəliliyinin daha da güclənəcəyinə ümid etdiklərini açıqlayıb.

* QCT ("Qualcomm CDMA Technologies") - "Qualcomm"un əsas biznes bölmələrindən biridir və şirkətin yarımkeçirici çipsetləri və əlaqə həlləri istehsal edən seqmentidir. 

** GAAP (Generally Accepted Accounting Principles) — yəni "Ümumi Qəbul Edilmiş Mühasibat Prinsipləri" — maliyyə hesabatlarının hazırlanması və təqdim olunması üçün qayda və standartlar toplusudur. 

*** QTL ("Qualcomm Technology Licensing") lisenziya seqmenti "Qualcomm"un texnologiya və patentlər üzərindən gəlir əldə etdiyi biznes sahəsidir.

**** IoT (Internet of Things)  - "Əşyaların İnterneti" — müxtəlif fiziki cihazların internetə qoşularaq bir-biri ilə məlumat paylaşmasını təmin edən texnologiya sahəsidir. ( sensorlar, ağıllı ev cihazları, sənaye avadanlıqları, tibbi qurğular ağıllı saatlar və s.)

Rəhim