"Apple" "iMac G4" həvəskarları üçün sürpriz hazırlayır. 

Valyuta.az xəbər verir ki, tanınmış insayder Mark Qurmanın dediyinə görə, istehsalçı 20 il əvvəlki kult kompüterini ağıllı ev üçün cihaz şəklində "dirildəcək".

Söhbət "iPad", "Apple TV" və "HomePod"un imkanlarını birləşdirəcək çoxfunksiyalı mərkəzdən gedir. Qurman yazır ki, qurğu bucaq altında yerləşən kiçik displeyli yarımkürəşəkilli bazaya və "iMac G4" (2002) üslubunda stendə malik olacaq.

Maraqlıdır ki, cihazın displeyi "iPad" kimi düzbucaqlı deyil, kvadrat formada, bir-birinin yanında yerləşdirilmiş iki "iPhone" ölçüsündə olacaq. Ekranın kiçik ölçüsü sayəsində "Apple" yeniliyin qiymətini aşağı salmağı gözləyir. Şirkət əmindir ki, bu yolla istifadəçilər müxtəlif otaqlarda belə bir cihaz yerləşdirəcəklər.

Adı açıqlanmayan cihaz öz "homeOS" əməliyyat sistemini alacaq və "FaceTime", "Qeydlər" və "Təqvim"dən istifadə, foto və videoların nümayişi üçün uyğun olacaq. Həmçinin, cihaz ağıllı ev və dinamiki idarə etmək üçün mərkəz rolunu oynayacaq.

Qurğunun təqdimatı gələn ilin yazında gözlənilir. "Apple" həmçinin ekranı 360 dərəcə əymək, qaldırmaq, endirmək və döndərmək imkanı verən mexaniki hissə ilə daha premium versiya hazırlayır. Bu cihazın qiyməti 1000 dollara qədər olacaq və 2026-cı ildən tez olmayacaq.

Paşa Məmmədli