“Microsoft” şirkəti “Windows 11” üçün “Notepad” proqramına orfoqrafiya yoxlanışı və avtokorreksiya funksiyalarını təqdim edib. Bu, proqramın 1983-cü ildə buraxılmasından 40 ildən çox sonra baş verir.

Valyuta.az bu barədə "The Verge" nəşrinə istinadən xəbər verir.

"Notepad"da orfoqrafik yoxlama funksiyası "Word" və "Edge"də istifadə edilənə bənzəyir - səhvlər qırmızı rənglə vurğulanır. Bununla birlikdə, dəyişdirmə seçimlərini göstərmək üçün alt menyuda əlavə bir klik tələb olunur ki, bu da funksiyanın həyata keçirilməsini "Word"də oxşar funksiyadan fərqli edir. İstifadəçilər proqram parametrləri vasitəsilə .md, .srt, .lrc və .lic kimi müəyyən fayl növləri üçün orfoqrafiya yoxlamasını söndürə bilərlər.

Orfoqrafiya yoxlanışı işə salındıqda "AutoCorrect" hərf səhvlərini avtomatik düzəldir. Siz həmçinin parametrlərdə avtomatik düzəlişi söndürə bilərsiniz.

Qeyd olunur ki, yeniliklər ilk dəfə “Windows”un test versiyalarında mart ayında təqdim edilib. İndi onlar tədricən "Windows 11"in stabil versiyalarının istifadəçiləri üçün əlçatan olur. Yeni funksiyaların görünməsi üçün konkret tarixlər açıqlanmır.

"Notepad" proqramını daxil edən ilk əməliyyat sistemi 1985-ci ildə buraxılmış "Windows 1.0" idi.

Paşa Məmmədli