"Apple"Hindistanda və digər 91 ölkədə öz cihazlarının istifadəçilərinə mümkün casus proqram təhlükələri barədə xəbərdarlıq edib. 

Valyuta.az xəbər verir ki, bu barədə "Reuters" məlumat yayıb.

Şirkətin məlumatına görə, istifadəçilər casus proqram hücumunun qurbanına çevrilə bilər. Xəbərdarlıqlara baxmayaraq, "Apple" bu hücumların arxasında kimin və nə üçün olduğunu açıqlamayıb. Sakinlərinə xəbərdarlıq edilən ölkələrin siyahısı da açıqlanmır.

"Apple" sizin "Apple ID"nizlə əlaqəli "iPhone"u uzaqdan pozmağa çalışan haker casus proqram hücumunun qurbanı olduğunuzu aşkar edib. Bu hücum çox güman ki, kim olduğunuza və ya nə etdiyinizə görə sizə yönəlib. Xahiş edirik, bunu ciddi qəbul edin", deyə məktublarda bildirilir.

"Apple" bu xəbərdarlığı alan bütün istifadəçilərə "iPhone"da "Kilidləmə" rejimini aktivləşdirməyi tövsiyə edir. Müəyyən funksiyaları söndürməklə casus proqram hücumlarını məhdudlaşdırır. Bundan əlavə, cihazlarınızı iOS 17.4.1-ə yeniləmək və zəruri hallarda mütəxəssislərlə əlaqə saxlamaq tövsiyə olunur.

Şirkət həmçinin təhdid bildirişlərinin necə işlədiyinə dair məlumatları və casus proqramların qurbanı ola biləcək istifadəçilər üçün məsləhətləri daxil etmək üçün "iPhone" dəstək sənədini yeniləyib. Şirkət zərərli proqram fəaliyyəti aşkar etdikdə, e-poçt və "iMessage" vasitəsilə bildirişlər göndərir. "Apple ID" saytına daxil olan istifadəçilər səhifənin yuxarı hissəsində təhlükə bildiriş bannerini də görəcəklər.

Paşa Məmmədli