GSMA mobil internetin vəziyyəti ilə bağlı illik hesabatında dünyada smartfon sahiblərinin sayının 4,3 milyard nəfərə çatdığını bildirib. 

Valyuta.az xəbər verir ki, bu, Yer kürəsinin ümumi əhalisinin təxminən 55%-ni təşkil edir.

Araşdırmaya görə, 4,6 milyard insan internet istifadəçisidir və onlardan 4 milyardı smartfon vasitəsilə internetə qoşulur. Qalan 600 milyon insan internetə daxil olmaq üçün adi telefonlardan istifadə edir.

Dünya əhalisinin 92%-nin mobil rabitə əhatə dairəsində yaşamasına baxmayaraq, demək olar ki, 3,4 milyard insanın hələ də internetə çıxışı yoxdur. İnternetə çıxışı olmayan insanların arasında Qara Afrika əhalisinin 59%-i və Cənubi Asiyanın 52%-i göstərilir.

Bölgədən asılı olaraq əlaqə keyfiyyəti və sürətində də əhəmiyyətli fərqlər var. Məsələn, ABŞ, Sakit Okean və Şərqi Asiyada smartfon istifadəçilərinin 69%-nin 4G şəbəkələrinə çıxışı var, Afrika və Yaxın Şərqdə isə istifadəçilərin əksəriyyəti bugünkü standartlara görə köhnəlmiş üçüncü nəsil şəbəkələrə böyük etibar edir.

Paşa Məmmədli