ABŞ-ın Virciniya Universitetinin professoru, məşhur “Batman” filmlərindəki əfsanəvi ad “Mr.Freeze”in istifadə etdiyi  bir alətə bənzər dondurucu silah hazırlayıb.

Valyuta.az “İndependet”ə istinadən xəbər verir ki, mexanika və aerokosmik mühəndislik üzrə professor Patrik Hopkins, 1997-ci ildə çəkilmiş "Batman və Robin" filmindən ilhamlanaraq hazırladığı silahın dondurucu şüasının lazım olduğu kimi işlədiyini bildirib. Hopkinsin əsas məqsədi kosmos gəmilərində və yüksək hündürlükdə uçan təyyarələrdə elektronikanı sərinlətmək üçün yeni üsul tapmaq idi. İxtiraçı alim araşdırma ilə bağlı açıqlamasında, "Hazırda əsas problemimiz budur. Təyyarədəki bir çox elektron cihazlar isinir, lakin onları soyutmaq mümkün deyil" - sözlərini söyləyib.

ABŞ Hərbi Hava Qüvvələrindən 750.000 dollar qrant alan Hopkins, səthi soyuda bilən kiçik plazma lazeri dizayn edib. Onun sözlərinə görə, kosmik gəmilərdə soyutma üçün havadan istifadə etmək demək olar ki, mümkün deyil. Çünki hava çox azdır. Buna görə də astronavtlar özləri ilə soyuducu mayelər gətirməlidirlər. Lakin bu, nəqliyyat vasitəsinin çəkisini artırdığı üçün effektiv üsul deyil. 

Hopkins və komandası “ACS Nano” elmi jurnalında dərc olunmuş yeni məqalələrində hazırladıqları prototip plazmanın qeyri-adi fiziki xüsusiyyətindən istifadə etdiklərini və bunu “maddənin dördüncü vəziyyəti” adlandırdıqlarını bildirib. Müvafiq olaraq, plazma reaktiv səthə sürətlə dəydikdə, onu qızdırmazdan əvvəl soyuda bilər. Əvvəlki təcrübələrdə Hopkins və həmkarları plazma reaktivinin qızılla örtülmüş səthi qızdırmazdan əvvəl soyuduğunu aşkar etmişdilər. Komandanın bu xüsusiyyət üzərində fokuslanaraq inkişaf etdirdiyi cihaz mikrosaniyələr ərzində səthin istiliyini bir neçə dərəcə azalda bilir. Hopkinsə görə, bu xüsusiyyət kosmosda və ya həddindən artıq yüksəklikdə elektron sistemlərin temperaturunda fərq yaratmaq üçün kifayət edə bilər.

Elmir