“Səhiyyənin Təminat Mərkəzi”nin tibbi avadanlıqların satınalınması ilə bağlı tenderə yekun vurulub.

Valyuta.az-ın xəbərinə görə, tenderin qalibi “Arash Medical Company” MMC olub. Tərəflər arasında bağlanacaq satınalma müqaviləsinin maliyyə dəyəri 7 milyon 68 min 188 manatdır. Bununla da, “Arash Medical Company” MMC bu il ərzində 19 tenderin qalibi olub və şirkətlə 21 milyon 327 min 517 manat 52 qəpiklik satınalma müqavilələri bağlanıb.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, "Arash Medical Company" QSC 22 iyun 2011-ci ildə qeydiyyata alınıb. Nizamnamə kapitalı 2000 manatdır. Şirkətin qanuni təmsilçisi Məmmədov Kamran Abid oğludur. 

Kamran Məmmədov haqqında açıq mənbələrdə heç bir məlumat yoxdur. 

"Arash Medical Company" QSC 2019-cu ilə qədər MMC kimi fəaliyyət göstərib. Həmin ildən şirkətin təşkilati-hüquqi forması dəyişib. 

2015-ci ilə qədər şirkətin qanuni təmsilçisi Əsədov Cavid Bəxtiyar oğlu olub. Cavid Əsədov Milli Məclisin keçmiş spikeri Oqtay Əsədovun yaxın qohumudur. Yerli mediada tirajlanan məlumatlarda iddia olunur ki, o, keçmiş spikerin qardaşı oğludur. 

İddialara görə, şirkət əslində Oqtay Əsədovun nəzarətindədir. Qarşı tərəf bunu təkzib etsə də, mediada bu məsələdə israr edir. 

"Arash Medical Company" QSC adətən iri məbləğli tenderlərin qalibi seçilir. Bu tenderlər tibbi avadanlıqların satın alınması ilə bağlı olur. 

Əvəz Həsənov